Dünyaca məşhur futbolçu Kristiano Ronaldo rekordlarla dolu karyerasının ardından peşəkar futbolçu həyatında son mərhələyə qədəm qoymaq istədiyinə dair mesaj verib.
5 dəfə "Qızıl top" (Ballon d'Or) mükafatını qazanan 41 yaşlı portuqaliyalı ulduz xanımı Corcina Rodriqes ilə evləndikdən sonra "Vogue" jurnalına açıqlama verib. Təcrübəli hücumçu müsahibəsində deyib: "Bu, çox guman ki, futbol karyeramın son ilidir. Özümdən sonraya möhtəşəm bir miras qoymaq istəyirəm".
Gələcəyini tam şəkildə planlaşdırdığını bildirən K.Ronaldo ailəsi ilə daha çox vaxt keçirməyi səbirsizliklə gözlədiyini vurğulayıb.
Futboldan sonra yaranacaq boşluğu fərqli məşğuliyyətlərlə dolduracağını ifadə edən təcrübəli oyunçu səyahət etmək, həvəskarı olduğu padel oynamaq və 25 illik əzminin ardından əldə etdiyi uğurların dadını çıxarmaq istədiyini diqqətə çatdırıb.
1000 qol hədəfi
Bu yay Portuqaliya milli komandası ilə karyerasının altıncı Dünya çempionatında çıxış edən və rəqib qapılarına yol taparaq yeni rekorda imza atan K.Ronaldo indiyədək klub və milli komanda karyerasında ümumilikdə 976 qol vurub.
"Mançester Yunayted", "Real Madrid" və "Yuventus" kimi nəhəng klubların şərəfini qorumuş ulduz futbolcu karyerası ərzində 1000 qol həddini keçməyi hədəfləyir.
Səudiyyə Ərəbistanının "Əl-Nəsr" təmsilçisi ilə müqaviləsinin son ilinə daxil olan K.Ronaldonun bu mövsümdəki çıxışı onun tarixi hədəfinə çatıb-çatmayacağını müəyyənləşdirəcək.
