Qazaxıstan Prezidenti Kasım-Jomart Tokayev Almaniya ilə ümumi dəyəri 2 milyard dollara yaxınlaşan kommersiya sazişləri imzaladıqlarını bildirib.
Qazaxıstan Prezident Administrasiyasının məlumatına görə, Almaniyaya rəsmi səfər edən Tokayev paytaxt Berlində Almaniya Kansleri Fridrix Merts (Friedrich Merz) ilə görüşüb.
Görüşdə tərəflər Qazaxıstan ilə Almaniya arasında çoxşaxəli əməkdaşlığın möhkəmləndirilməsi istiqamətində qətiyyətlərini ifadə ediblər.
Tərəflər iki ölkə arasında əməkdaşlığın sənaye, kritik əhəmiyyətə malik minerallar, nəqliyyat və logistika, rəqəmsal texnologiyalar, habelə maşınqayırma və kimya sənayesi daxil olmaqla yüksək əlavə dəyərli istehsal sahələrində inkişaf etdirilməsi üçün mühüm potensialın olduğunu qeyd ediblər.
Ayrıca tərəflər, başda "Mərkəzi Asiya-Almaniya" formatı olmaqla, beynəlxalq təşkilatlar çərçivəsində əməkdaşlığın artırılması barədə razılığa gəliblər.
30-dan çox kommersiya sazişi imzalanıb
Tokayev və Merts danışıqlardan sonra birgə mətbuat konfransı keçiriblər.
Qazaxıstan Prezidenti Tokayev etdiyi çıxışda ümumi dəyəri təxminən 2 milyard dollar olan 30-dan çox kommersiya sənədinin imzalandığını bildirib.
Müqavilələrin səmərəli şəkildə icrasının iki ölkə arasındakı əməkdaşlığı daha da gücləndirəcəyini vurğulayan Tokayev Almaniya səfərinin növbəti mərhələsində Bavariyaya səfər edəcəyini və yüksəksəviyyəli rəsmilərlə görüşəcəyini qeyd edib.
Tokayev, həmçinin səfər çərçivəsində təşkil olunacaq Qazaxıstan-Bavariya Texnologiya Forumunda iştirak edəcəyini açıqlayıb.
Tokayev Mertsi Qazaxıstana dəvət edib
Danışıqlarda regional və qlobal gündəmdəki prosesləri də müzakirə etdiklərini bildirən Tokayev hər bir münaqişənin dinc və diplomatik yollarla həll edilməli olduğunu, bunun iki ölkənin ortaq mövqeyi olduğunu ifadə edib.
Tərəflərin "Mərkəzi Asiya-Almaniya" formatındakı dialoqun inkişaf etdirilməsi mövzusunda da razılığa gəldiyini bəyan edən Tokayev Qazaxıstanın Almaniya ilə uzunmüddətli, qarşılıqlı faydaya əsaslanan və konkret nəticələrə yönəlmiş strateji tərəfdaşlığı gücləndirməyi hədəflədiyini vurğulayıb.
Görüşlərin sonunda Tokayev Almaniya Kansleri Mertsi Qazaxıstana dəvət edib.
Tokayev, həmçinin Almaniya Prezidenti Frank-Valter Ştaynmayer (Frank-Walter Steinmeier) ilə də görüş keçirib.
