Həkimlər dağılmış binalara və sunami xəbərdarlıqlarına səbəb olan güclü zəlzələdə ölənlərin sayının 40-ı keçdiyini bildiriblər.

Milli və yerli fəlakət qurumlarının bildirdiyinə görə, iyunun 8-də Mindanaonun cənubunda baş verən 7,8 maqnitudalı zəlzələdən sonra minlərlə insan ev-eşiyindən olub və 450-dən çox insan yaralanıb, lakin hazırda yalnız dörd nəfərin itkin düşdüyü güman edilir.

Rəsmilər ən azı 479 yaralanma hadisəsi barədə məlumat verib; bunlardan 456-sı 12-ci bölgədə, 23-ü isə Davao bölgəsində qeydə alınıb.

Zəlzələ cənubi Mindanao daxilində təxminən 88 min insana təsir edib; onlardan 22 min 690-ı ev-eşiyindən olub. Rəsmilər yeraltı təkanların davam etməsi və binaların struktur təhlükəsizliyi ilə bağlı narahatlıqlar səbəbindən bir çox sakinin açıq sahələrdə qaldığını bildiriblər.

“Ən çox zərər çəkən Sarangani vilayətində bəzi ərazilərə yalnız helikopterlə daxil olmaq mümkündür və yeraltı təkan qorxusu xilasetmə işlərini ləngidib”, -deyə yerli rəsmilər brifinqdə jurnalistlərə məlumat verib.

Regionun mülki müdafiə rəhbəri Rodriqo Sosmena "Hələ də yeraltı təkanlar davam edir, buna görə də xilasetmə qrupları çox ehtiyatlı davranırlar. Ona görə də xilasetmə işləri çətinliklə aparılır” deyib.

İlk zəlzələdən təxminən iki saat sonra bölgə güclü yeraltı təkanlarla sarsılıb.

İnfrastrukturun zədələnməsi səbəbindən, yolların dağılması və bir körpünün uçması nəticəsində bəzi icmalar ən azı bir həftə ərzində təcrid olunmuş vəziyyətdə qalacaq.

Bölgənin ən böyük şəhəri olan General Santosun bir qədər yaxınlığındakı xəstəxanada AFP müxbirləri açıq havada qurulmuş müvəqqəti pərdə arxasında doğum edən anaya şahidlik ediblər.

Glan bələdiyyəsində ən azı 13 nəfərin torpaq sürüşməsi nəticəsində evlərinin altında qaldığı yerdə, başqa bir xəstəxananın heyəti binanın struktur bütövlüyü ilə bağlı narahatlıqlar səbəbindən 60-dan çox xəstənin müəssisənin xaricindəki çarpayılarda olduğunu bildirib.

"Xəstəxana çox ciddi ziyan görüb," deyə qeyd edilib. Bələdiyyə mühəndisi binadan istifadə edə bilməyəcəyinə qərar verib.

Bu gün səhər saatlarına olan məlumata görə, AFP-yə çatan vilayət mənbələrinə əsasən, ölənlərin sayı 41 olaraq qeydə alınıb.

Rəsmilər doqquz körpü və 19 yolun zədələndiyini bildiriblər. İnfrastruktur itkilərinin 900 milyon pesonu (14,6 milyon ABŞ dolları) keçdiyi təxmin edilir.

Ümumilikdə 1 889 evə ziyan dəyib, onlardan təxminən 1 500-ü tamamilə dağılıb. Əmlak itkiləri 15 milyon peso (243,607 ABŞ dolları) olaraq qiymətləndirilib; qiymətləndirmələr davam edir və rəqəmlər dəyişə bilər.

Təhsil Nazirliyi Mindanao daxilindəki məktəblərdə ciddi ziyan olduğunu bildirib. İlkin qiymətləndirməyə görə, beş bölgədəki 231 dövlət məktəbində 1 159 sinif otağı zədələnib.

Xilasetmə fəaliyyətləri

General Santosda uçan bir ərzaq mağazasının qarşısında xilasetmə qrupları gecə fasiləsindən sonra bina çökən zaman içəridə olan iki mağaza işçisini xilas etmək üçün işləri yenidən başladıb.

AFP müxbirləri xilasedici itlərin və qrupların sınıq beton qalıqlarını və iti metal çubuqları diqqətlə axtarmasını izləyiblər.

Yerli bir xilasetmə işçisi işin artıq xilas etməkdən çox meyitlərin çıxarılması xarakteri daşıdığını söyləyib; daha yüksək rütbəli bir rəsmi isə sonradan bu qərarın hələ rəsmən verilmədiyini bildirib.

Yaxınlıqdakı bir kurort zonasında yüksək sürətli Sahil Mühafizə gəmisi zəlzələ baş verən zaman şiddətlə dalğalanan sularda üzərkən itkin düşən iki nəfəri axtarıb.

İyunun 8-də sosial mediada paylaşılan videolar General Santosda "Jollibee" fast-fud restoranı olan bir ticarət mərkəzinin dağıdıcı şəkildə çökməsini göstərir, başqa bir yerdə isə boş bir məktəb binasının uçduğu görünür.

Digər bir videoda isə azyaşlı məktəblilərin, zəlzələ onları şiddətlə sağa-sola silkələyərkən müəllimlərinin qollarında qışqırdıqları görünür.

Zəlzələ səbəbindən bir çox ölkə və regional sunami xəbərdarlığı mərkəzi tərəfindən sunami xəbərdarlıqları verildikdən sonra Filippinin cənubundakı sahil bölgələrində və qonşu İndoneziyada minlərlə insana təxliyə əmri verilib.

Lakin günorta saatlarına qədər təhlükə sovuşub və xəbərdarlıqlar ləğv edilib.

Rəsmilərin sunami xəbərdarlığı etdiyi Yaponiyanın Sakit okean sahili sularına çatan dalğaların hündürlüyünün 20 santimetrdən çox olmadığı bildirilib.

Şərqi Mindanao oktyabr ayında 7,4 və 6,7 maqnitudalı iki zəlzələ ilə sarsılmış, ən azı səkkiz nəfər həyatını itirmişdi.