İsveçrənin Bürgenştok şəhərində keçirilən Lüsern sammiti çərçivəsində ABŞ və İran nümayəndə heyətləri arasında aparılan danışıqlar iyunun 22-də yekunlaşıb. Danışıqlar tərəflərin bir sıra mühüm mexanizmlər üzərində ortaq məxrəcə gəlməsi ilə nəticələnib. ABŞ-nin vitse-prezidenti Cey Di Vens və İran parlamentinin sədri Məhəmməd Baqer Qalibafın rəhbərlik etdiyi görüşün ilkin raundu 100 dəqiqə davam edib.

Vasitəçilərin birgə bəyanatına əsasən, İsveçrədə baş tutan görüşdə tərəflər ilk növbədə vasitəçilik prosesinə siyasi nəzarəti təmin edəcək xüsusi komitənin yaradılması barədə razılığa gəliblər. Eyni zamanda, İranın nüvə proqramı, sanksiyalar və mövcud memorandumun icrası zamanı ortaya çıxa biləcək mübahisələrin həlli məqsədilə ekspertlərdən ibarət işçi qrupları formalaşdırılıb. ABŞ və İranın baş müzakirəçilərinin rəhbərlik edəcəyi bu qruplar fəaliyyətləri barədə yüksək səviyyəli komitəyə müntəzəm hesabatlar təqdim edəcək. Danışıqlar nəticəsində 60 gün ərzində yekun sazişin imzalanmasını nəzərdə tutan yol xəritəsi təsdiqlənib.

Regional təhlükəsizliyi təmin etmək məqsədilə Hörmüz boğazında xüsusi rabitə kanalı yaradılıb. Bu addım ticarət gəmilərinin təhlükəsiz hərəkətini təmin etməyə və mümkün insidentlərin qarşısını almağa yönəlib. Bununla yanaşı, Livanda hərbi əməliyyatların dayandırılmasına nəzarət etmək məqsədilə vasitəçilərin iştirakı ilə xüsusi "gərginliyi azaltma qrupu" yaradılıb. Vasitəçi qismində çıxış edən Qətər və Pakistan isə danışıqlardakı müsbət ab-havanı qorumaq və tərəflərin yekun razılığa gəlməsinə dəstək vermək üçün səylərini davam etdirəcəklərini bəyan ediblər.