İran həftələrdir faktiki olaraq bağlı olan Hörmüz boğazından Pakistan bayrağı altında üzən daha 20 gəminin keçməsinə icazə verməyi qəbul edib.
Pakistanın xarici işlər naziri İshaq Dar "X" hesabında etdiyi paylaşımda bu addımı təsdiqləyərək, bunu təqdirəlayiq və konstruktiv bir jest kimi qiymətləndirib.
Dar bildirib ki, bu addım sülhün carçısıdır və regionda sabitliyin bərqərar olmasına kömək edəcək. Dialoq, diplomatiya və bu növ etimad artıran tədbirlər gələcəyə doğru yeganə yoldur.
Pakistan martın 30-da Yaxın Şərqdəki müharibə ilə bağlı dördtərəfli görüşə ev sahibliyi etməyə hazırlaşır. Türkiyə, Pakistan, Misir və Səudiyyə Ərəbistanının yüksək rütbəli diplomatları ABŞ-İsrailin İrana qarşı müharibəsinin ikinci ayına qədəm qoyduğu bu ərəfədə gərginliyi azaltmaq səylərini müzakirə etmək üçün İslamabadda bir araya gələcəklər.
Qeyd edək ki, Hörmüz boğazı 28 fevralda ABŞ və İsrailin İrana qarşı hücumlarının şiddətlənməsindən sonra, mart ayının əvvəlindən bəri faktiki olaraq bağlı vəziyyətdədir. Müharibədən əvvəl boğazdan gündə orta hesabla 138 gəmi keçirdi.
