ABŞ prezidenti Donald Tramp ilə Venesuelanın müvəqqəti dövlət başçısı Delsi Rodriqez ilk dəfə bir araya gəliblər. Tərəflər iki ölkə arasındakı əlaqələrin möhkəmləndirilməsi məsələsini müzakirə ediblər. Həmçinin energetika, dağ-mədən sənayesi və təhlükəsizlik sahələrində əməkdaşlığın inkişaf etdirilməsi diqqət mərkəzində olub.
Bu barədə D.Rodriqez "X" sosial şəbəkə platformasındakı hesabında paylaşım edərək bildirib. O, Birləşmiş Millətlər Təşkilatının (BMT) 81-ci Baş Assambleyası çərçivəsində keçirilən bu görüşü "tarixi" hadisə kimi qiymətləndirib.
D.Rodriqez D.Tramp ilə iki ölkə arasındakı münasibətlərin gücləndirilməsi mövzusunu müzakirə etdiklərini bildirib. O, həmçinin energetika, dağ-mədən sənayesi və təhlükəsizlik kimi strateji sahələrdə əməkdaşlıq gündəliyinin irəliyə aparılması barədə danışdıqlarını qeyd edib. D.Rodriqez ölkəsində baş verən zəlzələlərdən sonra Vaşinqton administrasiyasının göstərdiyi dəstəyə görə prezident D.Trampa təşəkkürünü bildirib.
Venesuelanın müvəqqəti dövlət başçısı Vaşinqton rəhbərliyinin ölkəsinin "çoxşaxəli platformalara yenidən inteqrasiyası prosesinə" verdiyi dəstəyi də yüksək qiymətləndirib. O, rəsmi Karakas ilə Vaşinqton hakimiyyəti arasındaki əlaqələrin dialoq yolu ilə inkişaf etdirilməsinin vacibliyini vurğulayıb.
Qeyd edək ki, rəsmi Vaşinqton ilə Karakas rəhbərliyi arasında son dövrdə yaşanan yaxınlaşmanın ən mühüm addımlarından biri avqust ayında elan edilən energetika sazişi olmuşdu. Saziş çərçivəsində ABŞ-yə Venesueladakı 17 neft yatağı üzrə 100 illik imtiyazların verilməsi nəzərdə tutulub. Bu yataqlar təxminən 65 milyard barellik sübut olunmuş ehtiyatı əhatə edir.
Xatırladaq ki, tərəflər arasındakı bu görüş ABŞ-nin 3 yanvardakı hərbi müdaxiləsindən sonra baş tutan ilk birbaşa təmasdır. Həmin müdaxilə zamanı Venesuela dövlət başçısı Nikolas Maduro saxlanılmışdı.
