İsrail ordusunun yaydığı bəyanata əsasən, aprelin 7-də İranın cənub-qərbində yerləşən Şiraz şəhərindəki neft-kimya kompleksinə hava zərbələri endirilib. İsrail tərəfi həmin müəssisədə partlayıcı maddələrin və ballistik raket istehsalında istifadə olunan komponentlərin hazırlandığını ifadə edərək əməliyyatın məqsədinin İranın hərbi imkanlarını və silah proqramlarını zəiflətmək olduğunu bildirib.

Aprelin 4-də Xuzistan əyalətindəki strateji kommunal müəssisələrə endirilən zərbələr nəticəsində 50-dən çox sənaye obyekti elektrik, qaz və su təminatından məhrum qalıb. Aprelin 6-da isə Aseluyədəki Cənubi Pars neft-kimya kompleksi hədəf alınıb.

İsrailin müdafiə naziri İsrael Katz hücumların İranın neft-kimya ixrac potensialının təxminən 85 faizini təşkil edən obyektləri sıradan çıxardığını və həmin müəssisələrin fəaliyyətinin tamamilə dayandığını bəyan edib.

Fevralın 28-də ABŞ və İsrailin İrana qarşı həyata keçirdiyi birgə hərbi əməliyyatları ilə başlayan regional gərginlik artıq tammiqyaslı müharibə müstəvisinə keçib.

Münaqişə nəticəsində bu günə qədər aralarında uşaqlar və İranın ali dini lideri Əli Xameneinin də olduğu 1340-dan çox insan həyatını itirib. İran tərəfi bu hücumlara cavab olaraq İsrail, İordaniya, İraq və ABŞ hərbi bazalarının yerləşdiyi Körfəz ölkələrinə PUA və raket hücumları həyata keçirib.

Bu münaqişə ciddi infrastruktur dağıntılarına və insan itkilərinə səbəb olmaqla yanaşı, qlobal bazarlara və mülki aviasiya təhlükəsizliyinə də ağır zərbə vurub.