Türkiyənin daxili işlər naziri Mustafa Çiftçi İstanbulun Beşiktaş səmtindəki "Yapı Kredi Plaza" kompleksinin qarşısında baş verən atışma nəticəsində üç silahlının zərərsizləşdirildiyini, iki polis əməkdaşının isə yüngül yaralandığını açıqlayıb. Nazirin sözlərinə görə, şübhəlilər asayiş keşikçilərinə atəş açdıqdan sonra dərhal görülən tədbirlər nəticəsində zərərsizləşdiriliblər. Hadisə yerinə gələn İstanbul valisi Davut Gül silahlılardan birinin öldürüldüyünü, digər ikisinin isə zərərsizləşdirildiyini ifadə edərək çevik müdaxiləyə görə polis heyətini təbrik edib. İlkin araşdırmalar zamanı şübhəlilərin İzmitdən İstanbula icarəyə götürülmüş nəqliyyat vasitəsi ilə gəldiyi müəyyən edilib və hazırda onların şəxsiyyətinin dəqiqləşdirilməsi istiqamətində işlər aparılır.

Türkiyə Prezidenti Administrasiyasının İctimaiyyətlə Əlaqələr İdarəsinin rəhbəri Burhanəddin Duran xəsarət alan polislərə şəfa diləyərək xalqın təhlükəsizliyi naminə fədakarlıqla xidmət edən polis əməkdaşlarına minnətdarlığını bildirib. B.Duran dövlətin hər cür təhdid və təxribatlara qarşı mübarizəni qətiyyətlə davam etdirəcəyini vurğulayıb. Ədliyyə naziri Akın Gürlek hadisə ilə bağlı prokurorluq tərəfindən genişmiqyaslı istintaqın başladıldığını, bir baş prokuror müavini və iki prokurorun hadisə yerinə göndərildiyini qeyd edib. Səlahiyyətli qurumlar hücumun miqyasını və motivlərini tam aşkar etmək üçün təhlükəsizlik bölmələri ilə koordinasiyalı şəkildə araşdırmaları davam etdirirlər.