Türkiyə Xəzinə və Maliyyə Nazirliyinin yaydığı məlumata görə, ölkəyə əlverişli şərtlərlə xarici investisiya cəlb etmək istiqamətində işlər uğurla davam edir. Bu çərçivədə Avropa İnvestisiya Bankı (AİB) ilə ümumi dəyəri 200 milyon avro olan iki yeni maliyyələşdirmə müqaviləsi imzalanıb. Türkiyənin ekoloji hədəflərinə uyğun olaraq cəlb edilən bu vəsait, yerli şirkətlərin və ixracatçıların bərpa olunan enerji, enerjiyə qənaət və təbiətə zərər verməyən sənaye layihələrinə qoyacağı investisiyaları maliyyələşdirmək üçün istifadə ediləcək. Son layihə ilə birlikdə Türkiyənin təkcə bu il ərzində əldə etdiyi sərfəli xarici maliyyə vəsaitinin ümumi dəyəri 4,9 milyard dollara yüksəlib.

Məsələ ilə bağlı açıqlama verən xəzinə və maliyyə naziri Mehmet Şimşek AİB ilə əməkdaşlıq nəticəsində Türkiyənin inkişaf layihələrinə verilən dəstəyin artmaqda davam etdiyini bildirib. Avropa İttifaqı (Aİ) ilə münasibətlərə diqqət çəkən nazir Mehmet Şimşek ölkənin Aİ ilə əlaqələrindəki müsbət dinamikanın xarici maliyyələşdirmə sahəsində də hiss olunacaq dərəcədə olduğunu vurğulayıb.