Türkiyənin xəzinə və maliyyə naziri Mehmet Şimşek "Kanal 7" tərəfindən təşkil edilən Yüksələn Türkiyə Zirvələrində çıxış edərək ölkənin qlobal ticarət marşrutlarındakı strateji rolu və iqtisadi gözləntilər barədə mühüm bəyanatlar verib. Nazir Türkiyənin "İnkişaf Yolu" və "Orta Dəhliz" kimi layihələrə yatırdığı investisiyaların qlobal parçalanma riskinə qarşı ölkənin mövqeyini gücləndirdiyini vurğulayıb.

Dünyanın görünməmiş səviyyədə qeyri-müəyyənlik, qütbləşmə və münaqişələrlə üz-üzə qaldığını qeyd edən M.Şimşek Yaxın Şərqdəki gərginliyin makroiqtisadi təsirlərinə diqqət çəkib. Nazir bildirib ki, bazarlar qlobal inflyasiyanın artması, maliyyə şərtlərinin sərtləşməsi və iqtisadi artım tempinin zəifləməsi riskləri ilə üz-üzədir.

Nazir Bəsrədən Türkiyəyə uzanan "İnkişaf Yolu" layihəsinin təxminən 1250 kilometrlik dəmir yolu və magistral xətti, həmçinin enerji dəhlizini əhatə etdiyini bildirib. Birləşmiş Ərəb Əmirlikləri, Qətər və İraqın da bu layihədə tərəfdaş olduğunu qeyd edən M.Şimşek Asiyanı Avropaya birləşdirən "Orta Dəhliz"in əsas hissəsinin məhz Anadoludan keçdiyini xatırladıb.

Layihənin mühüm komponentlərindən biri olan Yavuz Sultan Səlim körpüsünə toxunan nazir İstanbuldakı 3-cü körpünün dəmir yolu bağlantısı üçün xüsusi olaraq geniş inşa edildiyini vurğulayıb. 8,1 milyard dollarlıq bu nəhəng layihənin maliyyələşdirilməsinin 83 faizinin beynəlxalq maliyyə qurumları tərəfindən təmin ediləcəyi açıqlanıb. Mehmet Şimşek həmçinin Türkiyənin "Orta Dəhliz"i gücləndirmək məqsədilə Dünya Bankı ilə müqavilə imzaladığını da xatırladıb.