İslamabad Xarici İşlər Nazirliyi Pakistanın Baş naziri Şahbaz Şərifin ABŞ və İran arasında mümkün ikinci mərhələ sülh danışıqları ərəfəsində Səudiyyə Ərəbistanı, Qətər və Türkiyəni əhatə edən dörd günlük diplomatik səfər edəcəyini açıqlayıb.
Nazirlik bu gün (15 aprel 2026) verdiyi açıqlamada deyib: "Baş nazir Məhəmməd Şahbaz Şərif 15-18 aprel 2026-cı il tarixlərində Səudiyyə Ərəbistanı Krallığı, Qətər Dövləti və Türkiyə Cümhuriyyətinə rəsmi səfərlər edəcək".
Açıqlamada Səudiyyə Ərəbistanı və Qətər səfərlərinin "ikitərəfli kontekstdə" həyata keçiriləcəyi, Şərifin Türkiyədə Antalya Diplomatiya Forumuna qatılacağı və prezident Rəcəb Tayyib Ərdoğan və digər liderlərlə ikitərəfli görüşlər keçirəcəyi qeyd edilib.
Vaşinqton və Tehran ABŞ və İsrailin İrana hücum etməsi ilə başlayan və altı həftədən çox davam edən müharibəni sona çatdırmaq üçün səylərin davam etdiyi bir şəraitdə həftə sonu İslamabadda onilliklər sonra ilk dəfə üz-üzə danışıqlar aparıblar.
İranın cavab hücumları Səudiyyə Ərəbistanı və Qətər də daxil olmaqla Körfəzdəki ABŞ müttəfiqlərini hədəf alarkən, bölgədən enerji ixracına da mane olub.
İslamabad danışıqları münaqişəni sona çatdıracaq bir razılaşma olmadan başa çatsa da, ABŞ prezidenti Donald Tramp aprelin 14-də danışıqların bu həftə İslamabadda yenidən başlaya biləcəyini deyib.
ABŞ-nin İrana dəniz blokadası tətbiq edilməsi barədə əmr verməsinə baxmayaraq, tərəflər arasındakı kövrək atəşkəs gələn həftəyə qədər qüvvədə qalacaq.
Şərifi ABŞ-İran danışıqlarında vasitəçilərdən biri olan xarici işlər naziri İşak Dar və digər yüksək rütbəli rəsmilər müşayiət edəcək.
Qeyd edək ki, Pakistan və Səudiyyə Ərəbistanı yaxın münasibətlərə malikdir. Pakistan Maliyyə Nazirliyi rəsmi Riyadın Pakistanın valyuta ehtiyatlarını gücləndirmək üçün 3 milyard dollar ayıracağını açıqlayıb.
Bu dəstək Pakistanın Birləşmiş Ərəb Əmirliklərinə milyardlarla dollarlıq krediti geri qaytaracağını bəyan etməsindən bir neçə gün sonraya təsadüf edib.
Maliyyə Nazirliyi həmçinin Səudiyyə Ərəbistanındakı mövcud 5 milyard dollarlıq depozit müddətinin də qeyri-müəyyən müddətə uzadılacağını əlavə edib.
