ABŞ mediasında yayılan xəbərlərə görə, Pentaqon Kubaya qarşı mümkün hərbi əməliyyat üçün planlama işlərini sürətləndirir.
Mövzuya yaxın iki anonim mənbəyə əsaslanan "USA Today"in xəbərində; Tramp administrasiyasının adada əməliyyat başlatmağa qərar verməsi ehtimalına qarşı hazırlıqların intensivləşdirilməsi barədə göstəriş verildiyi bildirilib.
Bu vəziyyət, illərdir davam edən iqtisadi təzyiqlərdən sonra potensial gərginliyə işarə edir.
Digər bir xəbərdə isə "Zeteo" xəbər platforması ABŞ rəsmilərinin Ağ Evdən Kubaya qarşı mümkün hərbi müdaxilə planlarını daha da genişləndirmək üçün yeni göstəriş aldığını xəbər verib.
Pentaqonun rəsmilərindən biri Türkiyənin “Anadolu” xəbər agentliyinə bunları deyib: "Hipotetik ssenarilər üzərində spekulyasiya aparmayacağıq. Nazirlik müxtəlif fövqəladə hallara hazırlıq görür və Prezidentin təlimatlarını yönləndirildiyi şəkildə yerinə yetirməyə hazırdır".
Bu xəbərlər Trampın aprelin 13-də İran ilə müharibədən sonra ABŞ-nin "Kubaya gedə biləcəyini" söyləməsindən sonra yayılıb. Tramp həmçinin adanı "uğursuz bir ölkə" kimi xarakterizə edib. Daha əvvəl Tramp Kubanı "ələ keçirə" və ya "azad edə biləcəyini" irəli sürmüşdü.
“Müzakirəyə qapalı”
Kuba xarici işlər nazirinin müavini Anayansi Rodriguez Camejo “Anadolu” xəbər agentliyinə verdiyi açıqlamada ölkəsinin siyasi sistemi və liderliyinin “müzakirəyə açıq olmadığını” bildirdi. Lakin, qarşılıqlı maraq kəsb edən mövzularda dialoq və əməkdaşlığa açıq olduqlarını da vurğulayıb.
Rodriguez “ABŞ ilə aparılan müzakirələrdə bir çox qarşılıqlı maraq doğuran mövzu var. Bu mövzuları əməkdaşlıq çərçivəsində həll edə bilərik” deyib.
Kuba uzun müddətdir iqtisadi böhranla mübarizə aparır. Ölkədə yanacaq qıtlığı, fasiləli elektrik təchizatı və məhdud qida ilə dərman çatışmazlığı davam edir.
Havanadakı rəsmilər çətinliklərin böyük hissəsini onilliklərdir davam edən ABŞ sanksiyaları ilə əlaqələndirir. Digər tərəfdən isə amerikalı rəsmilər struktur iqtisadi problemlərin məsuliyyət daşıdığını müdafiə edirlər.
