Almaniya kansleri Fridrix Merts İsrailin Baş naziri Benyamin Netanyahu ilə telefon danışığı zamanı Fələstin ərazilərindəki mövcud vəziyyətdən narahatlığını ifadə edərək, işğal altındakı İordan çayının qərb sahilinin "qismən ilhaqının" yolverilməz olduğunu bildirib. Hökumət sözçüsü Stefan Korneliusun verdiyi məlumata görə, kansler Netanyahunu Livanın cənubundakı hərbi əməliyyatları dayandırmağa və Livan hökuməti ilə birbaşa sülh danışıqlarına başlamağa çağırıb.
Kanslerin bu mövqeyini Almaniya xarici işlər naziri Yohan Vadeful da livanlı həmkarı Yusif Raqqi ilə apardığı müzakirələr zamanı dəstəkləyib. Vadeful qeyd edib ki, İsrail və Livan arasında birbaşa təmaslar həm İsrailin təhlükəsizliyini, həm də Livanın suverenliyini təmin edən mühüm bir addım ola bilər. O, eyni zamanda ‘‘Hizbullah’’ın hücumlarının dayandırılmasının və tərksilah edilməsinin vacibliyini vurğulayaraq İsrail ordusunu mülki infrastrukturu qorumağa səsləyib.
Fevralın 28-dən davam edən və 2000-dən çox insanın həyatını itirməsinə səbəb olan hərbi gərginlik fonunda diplomatik səylər daha da intensivləşib. Pakistanın İranla bağlı müharibədə vasitəçilik cəhdlərindən sonra Livan və İsrail də danışıqlara başlamağa razılaşıblar. Tərəflər arasında ilk görüşün bu çərşənbə axşamı Vaşinqtonda keçirilməsi planlaşdırılır.
