"Tasnim" xəbər agentliyi İranın "Xatəmül-Ənbiya" hərbi qərargahının Oman körfəzində bir gəmiyə ABŞ ordusu tərəfindən edilən hücumu təsdiqlədiyini bildirib.

Rəsmi Tehran İran bayrağı altında üzən gəminin ələ keçirilməsindən sonra "dəniz quldurluğu" kimi təsvir etdiyi bu hərəkətə qarşı "yaxın zamanda" cavab veriləcəyini bəyan edib.

Hərbi qərargahdan verilən açıqlamada deyilib: "Təcavüzkar Amerika atəşkəsi pozaraq və dəniz quldurluğu edərək, Oman dənizi sularında İranın ticari gəmilərindən birinə atəş açıb, naviqasiya sistemini sıradan çıxararaq hücum edib".

Bundan əlavə, Çindən İrana doğru getdiyi bildirilən gəminin ABŞ-nin "sözügedən gəminin göyərtəsinə bir neçə terrorçu dənizçini yerləşdirməsindən" sonra ələ keçirildiyi təsdiqlənib.

İranın ali hərbi komandanlığı İran İslam Respublikası Silahlı Qüvvələrinin ABŞ ordusunun bu "silahlı qarətinə" cavab verəcəyi barədə xəbərdarlıq edib.

İranlı rəsmilər həmçinin hadisədən sonra İran qüvvələrinin ABŞ-nin bəzi hərbi gəmilərinə pilotsuz uçuş aparatları (PUA) ilə hücum etdiyini iddia ediblər.

Açıqlamada "İran İslam Respublikası Silahlı Qüvvələrinin bu silahlı quldurluğa yaxın zamanda cavab verəcəyi və qisas alacağı barədə xəbərdarlıq edirik" ifadələri işlədilib.

İranın dövlət mediası hadisənin atəşkəsin birbaşa pozulması demək olduğunu bildirib.