ABŞ Mərkəzi Komandanlığı (CENTCOM) ABŞ qüvvələrinin İrana məxsus çox sayda raket və pilotsuz uçuş aparatını (PUA) zərərsizləşdirdiyini açıqlayıb.

CENTCOM verdiyi açıqlamada ABŞ qüvvələrinin İranın Yaxın Şərqdə həyata keçirdiyi hücum cəhdlərinə cavab olaraq, İrana məxsus çox sayda ballistik raket və pilotsuz uçuş aparatını uğurla məhv etdiyini və Keşm adasına özünümüdafiə məqsədli zərbələr endirdiyini bildirib.

CENTCOM “X” platformasında paylaşdığı növbəti açıqlamasında Küveytdəki ABŞ qüvvələrinə hücum etməyə cəhd göstərən İrana məxsus daha bir PUA dalğasının da bu gecə hədəflərinə çata bilmədiyini əlavə edib.

Açıqlamada ABŞ hava hücumundan müdafiə sistemlərinin çox sayda pilotsuz uçuş aparatını uğurla vurduğu, həmçinin heç bir amerikalı hərbi qulluqçunun və ya obyektin zərər görmədiyi qeyd olunub.

Raketlər Küveyt və Bəhreyni hədəf aldı

CENTCOM İranın regiondakı qonşularına tərəf bir neçə ballistik raket atdığını və bu raketlərin heç birinin hədəfə dəymədiyini əlavə edib.

Komandanlıq bildirib ki, Küveytə atılan iki İran raketi hədəfə çata bilməyib və ya yolda parçalanıb. Bəhreynə atılan üç raket isə ABŞ və Bəhreyn hava hücumundan müdafiə qüvvələri tərəfindən dərhal zərərsizləşdirilib.

CENTCOM, həmçinin qüvvələrinin İranın regional sulardan keçən mülki dənizçilərə tərəf buraxdığı üç ədəd kamikadze PUA-nı vurduğunu qeyd edib.

Açıqlamada bildirilib ki, ABŞ qüvvələri, həmçinin Qeşm adasında İrana məxsus bir hərbi yerüstü idarəetmə stansiyasına özünümüdafiə məqsədli zərbələr endirib və heç bir ABŞ hərbçisi xəsarət almayıb.