Malta Leyborist Partiyası növbədənkənar parlament seçkilərində növbəti dəfə qələbə qazanıb. Bununla da partiya ardıcıl dördüncü dəfə hakimiyyətdə qalmağı bacarıb.
Ölkəni 2020-ci ildən bəri idarə edən Baş nazir Robert Abela xaricdən gələn məhsullardan çox asılı olan Maltanı Yaxın Şərq böhranının iqtisadi zərərlərindən qorumaq üçün yeni bir hökumətə ehtiyac olduğunu bildirmiş və seçkiləri bir il önə çəkmişdi. Seçkilərin nəticələri bəlli olduqdan sonra müxalifətdəki Milliyyətçi Partiyanın namizədi Aleks Borq məğlub olduğunu bildirib və R.Abelanı qələbə münasibətilə təbrik edib.
Malta iqtisadiyyatı ötən il 4 faiz inkişaf etsə də, yeni hökuməti qarşıda ciddi çətinliklər gözləyir. Hazırda ölkə artan inflyasiya, turizm sektorundakı durğunluq və sürətli əhali artımının səbəb olduğu infrastruktur problemləri ilə mübarizə aparır.
