Türkiyə Qazaxıstanla ticarət dövriyyəsini 7,9 milyard dollardan 15 milyard dollara çatdırmağı hədəfləyir. Prezident Rəcəb Tayyib Ərdoğanın Qazaxıstana səfəri çərçivəsində ticarət, nəqliyyat, enerji, maliyyə və müdafiə sənayesi sahələrində 13 mühüm saziş imzalanıb. Türkiyədə rəsmi səfərdə olan Qazaxıstan Prezidenti Kasım-Jomart Tokayev də türk sahibkarları üçün ölkəsində əlverişli şərait yaratmağa hazır olduqlarını bəyan edib. İki ölkə liderinin görüşündə iqtisadi əlaqələrin daha da genişləndirilməsi istiqamətində atılan addımlar yüksək qiymətləndirilib.
Məlumata görə, Türkiyənin Qazaxıstana ixracı 2021-ci illə müqayisədə təxminən iki dəfə artaraq 1,3 milyard dollardan 3,2 milyard dollara çatıb. İki ölkə arasında ticarət dövriyyəsi isə eyni dövrdə 2,9 milyard dollardan rekord həddə — 7,9 milyard dollara çatıb. Cari ilin ilk 9 ayında ikitərəfli ticarət dövriyyəsi artıq 6,8 milyard dollara yaxınlaşıb.
Bununla yanaşı, Türkiyə iş adamları Qazaxıstana təxminən 6 milyard dollar, Qazaxıstan isə Türkiyəyə 2,5 milyard dollar sərmayə yatırıb. Türk podratçıları tərəfindən Qazaxıstanda ümumi dəyəri 30,3 milyard dollar olan 550 layihə icra edilib ki, bu da Qazaxıstanı türk podratçılarının ən çox layihə həyata keçirdiyi 6-cı ölkə edib.
