Almaniya hökuməti Ukraynaya 200 milyon avro məbləğində maliyyə yardımı ayıracağını açıqlayıb.

Almaniya Xarici İşlər Nazirliyi və İqtisadi Əməkdaşlıq və İnkişaf Nazirliyinin birgə bəyanatında bildirilir ki, Rusiyanın endirdiyi zərbələr səbəbindən Ukraynada elektrik və su təchizatında gündəlik fasilələr yaranır, nəticədə getdikcə daha çox insan evini tərk etmək məcburiyyətində qalır.

Almaniyanın xarici işlər naziri Yohann Vadeful mülki infrastruktura endirilən zərbələrin Moskvanın ciddi danışıqlar aparmaq əvəzinə qış şəraitindən silah kimi istifadə etməyə çalışdığını göstərdiyini deyib. O, Rusiyanın Ukrayna xalqının müqavimətini qırmaq üçün istilik, su və enerji obyektlərini hədəf aldığını vurğulayıb.

İqtisadi əməkdaşlıq və inkişaf naziri Rim Alabali Radovan isə hücumlar nəticəsində milyonlarla ukraynalının işıqsız və istiliksiz qaldığını, bir çox bölgədə su təchizatının dayandığını qeyd edib. Nazir Rusiyanın Ukraynanı yaşayış üçün yararsız hala salmaq istədiyini, Almaniyanın isə enerji və istilik dəstəyi ilə ukraynalıların öz ölkələrində qalmasına kömək etdiyini bildirib.