Avropanı cənginə alan isti hava dalğası səbəbindən ölüm hallarında artım qeydə alınarkən, Fransada morqların dolduğu bildirilir. Səlahiyyətlilər tək yaşayan yaşlılar arasında tələfatın daha da artmasının mümkün olduğu barədə xəbərdarlıq edirlər.

Fransada rekord vuran isti hava dalğası nəticəsində ölüm hallarının artması səbəbindən paytaxt Parisdə morqların və dəfn evlərinin həddindən artıq dolduğu xəbər verilir.

Temperaturun 40°C-ni keçdiyi vaxtda Fransada hər gün qeydə alınan ölüm halları normal orta göstərici olan 900-1000-dən bir anda 1400-ün üzərinə çıxıb.

Fransa İctimai Səhiyyə Qurumu üç günlük müddət ərzində 1000-dən çox ölüm halının qeydə alındığını və həyatını itirənlərin 85 faizinin 65 yaş və yuxarı qrupda olduğunu bildirib. Paris bölgəsində evdə qeydə alınan ölüm hallarında da 40 faizlik artım müşahidə olunub.

Səlahiyyətlilər morqlarda yer qalmadığı üçün müvəqqəti soyutma kameraları quraşdıraraq, cəsədləri ətraf bölgələrə daşımaq məcburiyyətində qalıblar.

Bu böhran 2003-cü ildə 15 min insanın həyatına son qoyan tarixi isti hava dalğası ilə müqayisə edilir. Son hadisələr tək yaşayan yaşlı insanlara istiqamətli ictimai həmrəyliyin və dəstəyin artırılması çağırışlarına səbəb olub.