Rusiya rəsmiləri bildiriblər ki, Ukrayna PUA-larının bir neft emalı zavoduna və elektrik avadanlıqları zavoduna zərbə endirməsi nəticəsində azı üç nəfər yaralanıb.
Müdafiə Nazirliyi Kiyevin gecə boyu Rusiyanın 15 bölgəsində genişmiqyaslı PUA hücumu həyata keçirdiyini və onlardan təxminən 300-nün vurulduğunu qeyd edib.
Açıqlamada "hava hücumundan müdafiə sistemlərinin gecə ərzində Ukraynaya məxsus 289 ədəd sabit qanadlı pilotsuz uçuş aparatını zərərsizləşdirərək məhv etdiyi" ifadə olunub.
Digər tərəfdən, Ukraynanın "Unian" xəbər agentliyinin məlumatına görə, PUA-ların sayı daha çox olub və təkcə paytaxt Moskvaya qarşı təxminən 200 PUA buraxılıb.
Leninqrad qubernatoru Aleksandr Drozdenkonun sözlərinə görə, əsas hücumlardan biri Leninqrad vilayətini hədəf alıb. Qubernator gecə ərzində Ukraynaya məxsus 29 PUA-nın vurulduğunu iddia edib.
Drozdenko "Telegram" hesabında verdiyi açıqlamada hücumun bir neft emalı zavodunun yerləşdiyi Kirişi sənaye zonasındakı müəssisələrdə yanğına səbəb olduğunu bildirib.
"Kirişi sənaye zonasındakı yanğın nəzarətə alınıb və yanğınsöndürmə işləri tamamlanır. Düşmənin ilkin hədəfi KİNEF neft emalı zavodu idi. Hücum nəticəsində can itkisi qeydə alınmayıb", -deyə o qeyd edib.
Region rəsmiləri açıqlamada Çeboksarı şəhərində elektrik avadanlıqlarının hazırlanması və istehsalı ilə məşğul olan müəssisənin Ukraynanın PUA hücumuna məruz qaldığını və hadisə nəticəsində üç nəfərin yaralandığını bildiriblər.
Ukrayna həmçinin Çeboksarıda iki yaşayış binasını da vurub. Binada yaşayanlar təxliyə edilib. Şəhər rəhbərliyi yaxınlıqdakı küçələrdə hərəkətin məhdudlaşdırıldığını və məktəblər daxil olmaqla bəzi dövlət müəssisələrinin bağlandığını qeyd edib.
Ukrayna hələlik Rusiyanın iddiaları ilə bağlı şərh verməyib.
