Prezident Rəcəb Tayyib Ərdoğan Birləşmiş Millətlər Təşkilatının (BMT) Baş katibi Antonio Quterreş ilə görüşüb.
Görüşdə regional və qlobal məsələlər müzakirə olunub. Prezident Ərdoğan səlahiyyət müddətinin sonuna yaxınlaşan Quterreş ilə qlobal sülh və təhlükəsizliyə aid bir çox mövzuda sıx əməkdaşlıq etdiklərini deyib.
Dövlət başçısı Ərdoğan İsrailin Qəzzada sülh istəmədiyinin bir daha üzə çıxdığını, İordan çayının qərb sahilindəki məskunlaşma terroru və Qüdsdəki müqəddəs məkanlara edilən hücumların vəziyyəti daha da gərginləşdirdiyini, iki dövlətli həll zəmininin qorunmasının vacibliyini qeyd edib.
Prezident Ərdoğan İran və Ukraynada gərginliyin azaldılmasının zəruriliyini, Türkiyə olaraq diplomatik prosesə sadiq qalınması üçün səy göstərdiklərini, Hörmüz məsələsində region daxilindən formalaşacaq bir prosesin fayda verə biləcəyini ifadə edib.
Ərdoğan Qara dənizdə gəmiçilik təhlükəsizliyi üçün tərəflərdən məsuliyyətli mövqe nümayiş etdirmələrini gözlədiklərini, Türkiyənin Qara dənizdə ticarət gəmilərinin hədəf alınmasından narahatlığını vurğulayıb.
Prezident Ərdoğan görüşdə adada Kıbrıs türk xalqının suveren bərabərliyini və bərabər beynəlxalq statusunu tanımayan heç bir təklifin nəticə verməyəcəyini bəyan edib.
BMT-nin Baş qərargahındakı görüşdə Prezident Ərdoğan BMT-nin 81-ci Baş Assambleyası ilə bağlı hazırlanan xatirə dəftərini də imzalayıb.
Prezident Ərdoğan Qətər Əmiri Şeyx Təmim bin Həməd Al Tani ilə də görüşüb.
Türkiyə-Qətər ikitərəfli münasibətləri ilə regional və qlobal məsələlərin nəzərdən keçirildiyi görüşdə Prezident Ərdoğan Türkiyə və Qətər olaraq ikitərəfli əlaqələri sərmayə, ticarət, energetika və müdafiə sənayesi başda olmaqla hər sahədə daha yüksək səviyyəyə çatdırmaq üçün çalışmağa davam edəcəklərini bildirib.
Regionda enerji təchizatına mənfi təsir göstərən proseslərin hər kəsi çətin vəziyyətə saldığını qeyd edən Ərdoğan energetika və nəqliyyat dəhlizləri sahəsindəki əməkdaşlığı inkişaf etdirməyin vacibliyini vurğulayıb.
Prezident Ərdoğan İsrailin Qəzzada sülh istiqamətində addım atmamaqda israrlı olduğuna diqqət çəkərək, regiondakı İsrail təcavüzkarlığının qarşısının alınması üçün beynəlxalq birliyin güclü təzyiq göstərməsinin vacibliyinə də diqqət çəkib.
Prezident Rəcəb Tayyib Ərdoğan Seneqal Prezidenti Bəsiru Diomay Fay, Polşa Prezidenti Karol Navrotski, Böyük Britaniyanın Baş naziri Endi Börnhem, Yaponiyanın Baş naziri Takaichi Sanae və Banqladeşin Baş naziri Tariq Rəhman ilə ayrı-ayrılıqda görüşüb. Bu görüşlərdə də ikitərəfli münasibətlərlə yanaşı beynəlxalq məsələlər gündəm mövzusu olub.
