Trakya Balkan Türkləri Mədəniyyət və Həmrəylik Dərnəyinin sədri Cavad Günəş Bolqarıstanda 25 oktyabrda keçiriləcək prezident və vitse-prezident seçkiləri üçün Türkiyədə yaşayan ikili vətəndaşları səs verməyə çağırıb.
Cavad Günəş jurnalistlərə verdiyi açıqlamada Türkiyədə yaşayan ikili vətəndaşların seçkilərə böyük maraq göstərəcəyini gözlədiyini bildirib.
Bolqarıstanda səkkizinci dəfə prezident seçkilərinin keçiriləcəyini xatırladan Günəş seçkilərin 1 noyabrda keçiriləcək ikinci tura qalma ehtimalının yüksək olduğunu qeyd edib.
Türkiyədə yaşayan Bolqarıstan vətəndaşları üçün 18 müxtəlif vilayətdə 78 seçki qutusunun qurulacağını vurğulayan Günəş deyib: "Bu 18 müxtəlif vilayət arasında önə çıxanlar İstanbul, Bursa, İzmir və Tekirdağdır. Ədirnədə Bolqarıstan Baş Konsulluğunda bir seçki qutusu qurulacaq. Səhər saat 7-də başlayıb axşam 20:00-da başa çatacaq səsvermə prosesi, sıxlıq yaranacağı təqdirdə saat 21:00-a qədər davam edəcək".
"Demokratik hüquqlarından istifadə etmələri barədə çağırışımızı yeniləyirik"
Trakya Balkan Türkləri Mədəniyyət və Həmrəylik Dərnəyinin sədri Cavad Günəş ikili vətəndaşların Bolqarıstan şəxsiyyət vəsiqəsi və pasportları ilə səs verə biləcəklərini diqqətə çatdırıb.
Bolqarıstandakı seçkilərin Türkiyədə yaşayan ikili vətəndaşlar üçün mühüm olduğunu vurğulayan Günəş bunları deyib: "Biz dərnək olaraq soydaşlarımızın seçkidə fəal iştirak edərək demokratik hüquqlarından istifadə etmələri barədə çağırışımızı yeniləyirik. Seçkilərdə iştirak etmək və səs vermək vətəndaşlıq hüququmuzdur. Dərnək olaraq Bolqarıstandakı siyasi partiya və qurumların Türkiyədə yaşayan Bolqarıstan vətəndaşının da bərabərhüquqlu bir vətəndaş olduğunu dərk etmələrini arzulayırıq".
