Türkiyə Prezidenti Rəcəb Tayyib Ərdoğanın Astanaya səfəri çərçivəsində Türkiyə ilə Qazaxıstan arasında investisiya, enerji, müdafiə, təhsil, media və infrastruktur sahələrində 13 saziş imzalanıb.

Prezident R.T.Ərdoğan Qazaxıstan Prezidenti K.J.Tokayev ilə Astanadakı Müstəqillik Sarayında təkbətək görüşlər keçiriblər. Daha sonra Türkiyə-Qazaxıstan Yüksək Səviyyəli Strateji Əməkdaşlıq Şurasının 6-cı İclası baş tutub. Liderlər bu tədbirlərin ardınca təşkil olunan imzalama mərasiminə rəhbərlik ediblər.

İmzalanan mətnlər arasında ən diqqətçəkəni bilavasitə R.T.Ərdoğan və K.J.Tokayev tərəfindən təsdiqlənən sənəd olub. Bu sənəd "Türkiyə Respublikası ilə Qazaxıstan Respublikası Arasında Əbədi Dostluq və Tərəfdaşlıq Bəyannaməsi"dir.

İki ölkə həmçinin investisiyaların qarşılıqlı təşviqi və qorunmasına dair saziş imzalayıb. Bununla yanaşı, Türkiyə və Qazaxıstan hökumətləri arasında mədəniyyət mərkəzlərinin yaradılması, fəaliyyət göstərməsi və iş prinsipini tənzimləyən müqavilə də imzalanıb. Türkiyə ilə Qazaxıstan arasında hüquqi məsələlərdə məhkəmə yardımını nəzərdə tutan sazişə dəyişiklik edilməsi barədə protokol da qüvvəyə minib.

Təhsil, səhiyyə və media sahələrində mühüm addımlar

İmzalanan digər sazişlər çərçivəsində Türkiyənin Mədəniyyət və Turizm Nazirliyi ilə Qazaxıstanın Elm və Ali Təhsil Nazirliyi arasında birgə təqaüd proqramı başladılıb. Qazaxıstanın Elm və Təhsil Nazirliyi ilə Türkiyənin Milli Təhsil Nazirliyi arasında niyyət protokolu imzalanıb. Bu sənəd Qazaxıstanda Türkiyə Maarif Vəqfinə məxsus iki məktəbin açılmasını nəzərdə tutur.

İqtisadi və ticarət sahələrində də mühüm addımlar atılıb. Qazaxıstan hökuməti ilə "TAV Holding" arasında Almatı Beynəlxalq Hava Limanına dair investisiya sazişi imzalanıb. Digər tərəfdən, "Samruk-Kazyna" fondu ilə Türkiyənin "YDA İnşaat" şirkəti xəstəxana tikintisi layihələrinin maliyyələşdirilməsi üzrə əməkdaşlıq müqaviləsinə imza atıb.

Media sahəsində Qazaxıstan Prezidentinin Televiziya və Radio Kompleksi ilə Türkiyənin dövlət yayımçısı TRT arasında radio və televiziya yayımı sahəsində anlaşma memorandumu imzalanıb.

Astana Beynəlxalq Maliyyə Mərkəzi ilə İstanbul Maliyyə Mərkəzi arasında da əməkdaşlığı nəzərdə tutan anlaşma memorandumu qəbul edilib.

Enerji və müdafiə sənayesində strateji tərəfdaşlıq

Enerji sektorunda da böyük tərəfdaşlıqlara start verilib. "KazMunayGas" ilə Türkiyə Petrolları (TPAO) şirkəti arasında iki ayrı saziş imzalanıb. Bu sənədlər neft yataqlarına xidmət göstərilməsində əməkdaşlığı, həmçinin neft və təbii qaz layihələrinin birgə işlənilməsini əhatə edir.

Müdafiə sənayesi sahəsində isə iki ölkə strateji saziş imzalayıb. Sənəd "ANKA" pilotsuz uçuş aparatlarının (PUA) birgə istehsalı və texniki xidməti üçün müştərək müəssisənin yaradılmasını nəzərdə tutur.