Nijerya Hərbi Hava Qüvvələrinin Boko Haram terror təşkilatını hədəf alan hücumlarında ölkənin şimal-şərqindəki yerli bir bazarın vurulduğu, onlarla insanın öldüyü və çox sayda insanın yaralandığı bildirilib.
AP-nin verdiyi məlumata görə, rəsmilər yanlış hədəfin vurulduğunu təsdiqləsələr də, təfərrüat verməyiblər.
Nijerya Hərbi Hava Qüvvələri Borno ştatındakı Cilli xəttində Boko Haram üzvlərinin öldürüldüyünü açıqlayıb. Lakin “Reuters” xəbər agentliyinə aprelin 12-də verilən açıqlamada bazar meydanının vurulmasına toxunulmayıb.
Hava hücumları aprelin 11-də təşkil edilərkən, can itkisi ilə bağlı rəqəmlər mənbələrə görə dəyişib.
Bir hüquq təşkilatı “X” platformasında etdiyi paylaşımda "100-dən çox ölü" və 35 ağır yaralının olduğunu qeyd edərkən, yerli bir qəbilə lideri "200 ölü və yaralıdan" bəhs edib.
Beynəlxalq Əfv Təşkilatı on ildən artıqdır bölgəni viran qoyan üsyanın mərkəzi olan Borno ştatı sərhədinə yaxın, Yobe ştatındakı bir kənddə təşkil edilən hava hücumunda azı 100 nəfərin öldüyünü sağ qalanlarla görüşərək təsdiqlədiyini açıqlayıb.
Yobenin Qeydam bölgəsindəki Fuçimeram məhəlləsinin məclis üzvü və ənənəvi lideri Lavan Zanna Nur Qeydam “Reuters”ə verdiyi açıqlamada yaralıların Yobe və Bornodakı xəstəxanalara daşındığını söyləyib.
Telefonla danışan Qeydam "Cilli bazarında çox sarsıdıcı hadisə yaşandı. Hazırda sizə danışarkən, bazara təşkil edilən hava hücumunda 200-dən çox insan həyatını itirdi" deyib.
Digər üç bölgə sakini və beynəlxalq humanitar yardım təşkilatından bir rəsmi də hücumu və ehtimal olunan can itkisini təsdiqləyib.
Yobe Ştatı Fövqəladə Halların İdarə Edilməsi Agentliyi Cilli bazarındakı hadisə ilə bağlı ilkin hesabatları aldığını, hadisədə bəzi bazar satıcılarının zərər gördüyünün bildirildiyini və təcili müdaxilənin işə salındığını açıqlayıb.
Bazarda tibbi ləvazimatlar satdığını deyən 43 yaşlı Əhməd Əli isə partlayışda yaralandığını bildirib. Əli xəstəxanadan verdiyi açıqlamada "Çox qorxdum və qaçmağa çalışdım, amma bir dostum məni çəkdi və hamımız yerə uzandıq" deyib.
