Türkiyənin xarici işlər naziri Hakan Fidan regional sabitlik, qlobal enerji təhlükəsizliyi və beynəlxalq ticarət baxımından Hörmüz boğazında təhlükəsiz, sərbəst və fasiləsiz gəmi hərəkətinin qorunmasının strateji əhəmiyyət kəsb etdiyini vurğulayıb.
Moskvada rusiyalı həmkarı Sergey Lavrovla keçirdiyi görüşdən sonra mətbuata açıqlama verən Hakan Fidan ABŞ və İran arasında əldə olunmuş son razılaşmanı yüksək qiymətləndirib. Nazir bu addımı regionda gərginliyin azaldılması istiqamətində mühüm diplomatik nailiyyət kimi xarakterizə edib. Hakan Fidan Türkiyənin ən böyük gözləntisinin bu prosesin müvəqqəti sakitliklə məhdudlaşmayıb, uzunmüddətli və davamlı bir təhlükəsizlik sisteminə çevrilməsi olduğunu bildirib. O, rəsmi Ankaranın sazişin yekun imza mərhələsinə çatacağına və tam icra olunacağına ümid etdiyini qeyd edib.
Xarici işlər naziri yekun sənədlərin imzalanacağı bu həssas ərəfədə sülh mühitinə xələl gətirə biləcək ritorikadan uzaq durmağın, xüsusilə də İsrailin prosesi pozmaq cəhdlərinin qarşısının alınmasının vacibliyinə diqqət çəkib. ABŞ və İran rəhbərliyinin nümayiş etdirdiyi siyasi iradəni yüksək qiymətləndirən Hakan Fidan bu müddətdə Pakistanın vasitəçilik səylərini, həmçinin Qətər və Səudiyyə Ərəbistanının diplomatik dəstəyini məmnunluqla qarşıladıqlarını ifadə edib.
Hörmüz boğazının qlobal enerji bazarları üçün kritik rolunu xatırladan nazir, boğazın gəmilərin sərbəst keçidi üçün tam açıq qalmasının beynəlxalq ticarət üçün mühüm şərt olduğunu qeyd edib. Hakan Fidan rəsmi Ankaranın regional sülhə töhfə verəcək bütün diplomatik təşəbbüsləri bundan sonra da fəal şəkildə dəstəkləyəcəyini vurğulayıb.
