İran İslam İnqilabı Keşikçiləri Korpusu (SEPAH) ABŞ-nin hərbi obyektlərinə hücumlar həyata keçirdiyini və Hörmüz boğazından keçidin təhlükəli olduğunu bildirib.

SEPAH İordaniyadakı Əqəbə hava limanında yerləşən ABŞ təyyarələrinin ağır ballistik raket zərbələri ilə hədəfə alındığını iddia edib.

Açıqlamada Aqaba hava limanındakı ABŞ-yə məxsus "C-17" nəqliyyat və "P-8" kəşfiyyat təyyarələrinə ballistik raketlər atıldığı və onların bir neçəsinə ciddi ziyan dəydiyi qeyd olunub.

IRIB isə Müvəffəq Salti (Əzrəq) hava bazasındakı ABŞ qüvvələrinə məxsus 20 anqarın məhv edildiyini iddia edib.

"Mehr" xəbər agentliyinin məlumatına görə, İranın qərbindəki Kirmanşah əyalətinin İslamabad Qərb bölgəsində "MQ-9" tipli pilotsuz uçuş aparatı (PUA) aşkarlanaraq vurulub.

Məlumata əsasən, PUA SEPAH-ın Hava-Kosmik Qüvvələri tərəfindən idarə olunan və İranın inteqrasiya olunmuş hava hücumundan müdafiə şəbəkəsinə qoşulmuş müasir HHM sistemi tərəfindən zərərsizləşdirilib.

Tanker partlayışları

Digər tərəfdən, "Tasnim" xəbər agentliyinin məlumatına görə, SEPAH ötən gecə Hörmüz boğazının cənubunda iki neft tankerində partlayış baş verdiyini bəyan edib.

Agentlik gəmilərin strateji su yolundan keçməyə cəhd göstərdiyini və bunun "ABŞ təzyiqi"nin göstəricisi olduğunu bildirib.

SEPAH xəbərdarlıq edərək qeyd edib: "Bu keçid hətta kimyəvi gübrələrin və ya bir damla neft və qazın daşınması üçün belə təhlükəsiz deyil". Açıqlamada həmçinin ABŞ-nin bölgədəki hərbi əməliyyatları davam etdiyi müddətcə dəhlizin təhlükəsiz olmayacağı vurğulanıb.

Buna cavab olaraq ABŞ dövlət katibi Marko Rubio İranın Hörmüz boğazından təzyiq vasitəsi kimi istifadə etdiyini bildirib və digər ölkələri bu məsələ ilə bağlı tədbirlər görməyə çağırıb.

M. Rubio əlavə edib ki, ABŞ İranla bağlı məsələdə diplomatik həll yoluna açıqdır.