Türkiyə ictimaiyyəti “ByLock” mesajlaşma tətbiqindən ilk dəfə 15 iyul 2016-cı ildəki uğursuz çevriliş cəhdi zamanı xəbər tutdu. Araşdırmalar nəticəsində bu proqramın Fetullahçı Terror Təşkilatı üzvlərinin çevriliş cəhdi və digər planları üçün istifadə etdiyi əsas şifrəli rabitə şəbəkəsi olduğu ortaya çıxdı. Təşkilatın bütün gizli fəaliyyətlərini məhz bu mesajlaşma tətbiqi vasitəsilə idarə etdiyi müəyyən edildi.
Təhlükəsizlik mənbələrindən əldə edilən məlumata görə, ‘‘ByLock’’ aşkar edildikdən sonra maraq doğuran məqam tətbiqdə FETÖ üzvlərinə verilən FİN nömrələri oldu və təşkilat üzvlərinin tətbiqdə adları ilə deyil, onlara verilən nömrələrlə qeyd edildiyi müəyyənləşdirildi. FİN nömrələri təşkilat daxilindəki şəxslərin əhəmiyyətini və vəzifəsini göstərirdi. Araşdırmalar həmçinin bu FİN nömrələrinin ümumi sayının 215 mini keçdiyini ortaya qoydu. FİN nömrələri araşdırıldıqda “ByLock” tətbiqinin əvvəlcə məxfi üzvlər, təşkilatın yüksək vəzifəli şəxsləri və mühüm adlar arasında istifadə edildiyi məlum oldu.
FİN nömrələri araşdırıldıqda ilk 100-lükdə yer alan şəxslərdən biri də MİT-ə qarşı qurulan gizli plan işi üzrə mühakimə olunan keçmiş polis rəisi, FETÖ üzvü Erol Demirhandır. Demirhanın sistemdəki FİN nömrəsi 27-dir. Demirhandan sonra 28 FİN nömrəsi ilə siyahıda Ankara Polisinin keçmiş rəis müavini, FETÖ üzvü Oğuz Kiremitçi yer alır. İlk 100-lükdə yer alan digər diqqətçəkən şəxs isə 40 nömrəli FİN-lə Hrant Dink sui-qəsdi ilə bağlı mühakimə olunan Serkan Şahandır. Siyahıda 43 nömrəli FİN-lə qeyd olunan Cengiz Özkanın Rusiyanın səfiri Karlovun sui-qəsdini planlaşdıran Cemal Karata ilə əlaqədə olduğu bildirilir. Təşkilatın ABŞ-dakı imamı Mehmet Yaşa isə 49 nömrəli FİN-ə sahibdir. Onun "Atlanta Star Chain" adlı şirkətdə FETÖ üzvlərinə məxsus 30 milyon dolların mənimsənilməsində iştirak etdiyi qeyd olunur.
"ByLock-dakı FİN-lər təşkilat daxilindəki nüfuz dərəcəsini açıq şəkildə göstərir. FETÖ-yə sədaqəti ilə tanınan axtarışda olan jurnalist Cevheri Güven də bu siyahıdadır. Güvenin adı ilk 1000-liyə düşməsə də, o, təşkilatla əlaqəli jurnalistlər arasında birinci sıradadır. FETÖ-nün Qobbelssi kimi tanınan Güvenin FİN-i 3320-dir. Bu rəqəm axtarışda olan jurnalistin FETÖ-nün digər media mənsubları ilə müqayisədə nə qədər önəmli bir mövqedə olduğunu sübut edir.
