Ağ Evin rəsmi nümayəndəsi vitse-prezident Cey Di Vensin İranla danışıqların ikinci mərhələsi çərçivəsində Pakistana planlaşdırılan səfərinin təxirə salındığını açıqlayıb.
Prezident Donald Tramp aprelin 22-də verdiyi bəyanatda Pakistan rəsmi dairələrinin xahişi ilə Vaşinqtonun İrana konkret təklif hazırlamaq üçün əlavə vaxt verdiyini və bu məqsədlə atəşkəs müddətini uzatdığını bildirib.
Məlumata görə, Cey Di Vensin rəhbərlik etdiyi ABŞ nümayəndə heyətinin İslamabadda İran tərəfi ilə birbaşa danışıqlarda iştirakı planlaşdırılsa da, səfər Ağ Evdə keçirilən daxili məsləhətləşmələr səbəbindən təxirə salınıb.
Tərəflər arasında irəliləyiş əldə edilməsi üçün mühüm mərhələ hesab olunan bu görüşlərin yeni tarixi hələlik açıqlanmayıb.
Xatırladaq ki, əvvəlki razılaşmaya əsasən elan edilmiş atəşkəs rejiminin müddəti cari həftənin çərşənbə günü başa çatmalı idi.
