İran Prezidenti Məsud Pezeşkian ABŞ ilə gərginliyi azaltmaq üçün bütün rasional və diplomatik yolların araşdırılmalı olduğunu bildirib, amma əlavə edib ki, Vaşinqtonla münasibətlərdə sayıqlıq və inamsızlıq “danılmaz bir zərurətdir”.

İranın dövlət xəbər agentliyi İRNA-nın məlumatına görə, Pezeşkian deyib: "Təhdidlərin qarşısını alarkən gərginliyi azaltmaq üçün hər cür rasionallıq və diplomatik yoldan istifadə edilməlidir. Eyni zamanda, düşmənə qarşı inamsızlıq və münasibətlərdə sayıqlıq danılmaz zərurətdir".

Bundan əlavə, İran Xarici İşlər Nazirliyinin sözçüsü İsmayıl Bəqayi İranın ABŞ ilə növbəti danışıqlar mərhələsi keçirməyi planlaşdırmadığını söyləyib.

Sözçü İsmayıl Bəqayi ölkənin yarırəsmi "Tasnim" xəbər agentliyinin yaydığı bəyanatında "İran milli maraqlarını qorumaq üçün hər hansı son tarix və ya ultimatum qəbul etmir. Milli maraqların qorunması ehtiyac olduğu müddətcə davam edəcək və ABŞ və ya İsrail rejiminin hər hansı yeni avantürist təşəbbüsü olacağı təqdirdə, silahlı qüvvələr tam güclə və qətiyyətlə cavab verəcəkdir" deyib.

Bu açıqlamalar vasitəçilik prosesi ilə bağlı məlumatlı olan iki pakistanlı mənbənin Türkiyənin "Anadolu” xəbər agentliyi İran nümayəndə heyətinin ABŞ ilə ikinci tur görüşlərdə iştirak edəcəyini bildirməsindən sonra verilib.

Tehran və Vaşinqton ilk mərhələ danışıqlarını Pakistanın paytaxtı İslamabadda keçirmiş və bu görüşlər 12 apreldə razılaşma əldə olunmadan başa çatmışdı.

Tərəflər həmçinin Pakistanın vasitəçiliyi ilə 8 apreldə iki həftəlik atəşkəs elan etmişdilər. Bu atəşkəs fevral ayının sonlarında ABŞ və İsrailin İrana qarşı hücumları ilə başlayan və həftələrlə davam edən qarşıdurmalardan sonra əldə olunub.

İran 28 fevraldakı hücumlara cavab olaraq İsrailə və ABŞ hərbi varlıqlarına ev sahibliyi edən digər regional ölkələrə hücumlar təşkil edərək qisas almışdı.