Antalya Diplomatiya Forumu (ADF) aprelin 17-də öz işinə başlayıb. Türkiyə Prezidenti Rəcəb Tayyib Ərdoğanın sədrliyi və Xarici İşlər Nazirliyinin təşkilatçılığı ilə keçirilən forum "Sabahı formalaşdırarkən qeyri-müəyyənliklərlə mübarizə" mövzusuna həsr olunub.

Antalyada keçirilən tədbirdə 150-dən çox ölkədən nümayəndə heyəti, o cümlədən 20-dən artıq dövlət və hökumət başçısı, həmçinin 15-ə yaxın dövlət başçısının müavini iştirak edir. Ümumilikdə tədbirə 5000-ə yaxın qonağın qatılacağı gözlənilir.

İştirakçı dövlət başçılarının təxminən yarısı Afrika və Avropa ölkələrini təmsil edir. Xarici işlər nazirlərinin isə əsasən Afrika, Avropa və Asiya qitələrindən olduğu bildirilir. Forum çərçivəsində siyasi, iqtisadi, ekoloji və texnoloji çağırışların həllinə yönəlmiş 40-dan çox panel və müxtəlif səviyyəli müzakirələr təşkil olunacaq.

Sessiyalar forumun rəsmi internet səhifəsi və sosial media hesabları ilə yanaşı, Türkiyənin dövlət yayımçısı olan TRT tərəfindən də canlı yayımlanacaq. Türkiyənin xarici işlər naziri Hakan Fidanın forum çərçivəsində Balkan Sülh Platforması Xarici İşlər Nazirlərinin üçüncü görüşü, Qəzza sessiyası, Türk Dövlətləri Təşkilatının qeyri-rəsmi nazirlər toplantısı, eləcə də Türkiyə-Pakistan-Səudiyyə Ərəbistanı-Misir dördtərəfli görüşündə iştirakı planlaşdırılır.