Nazir Bayraktar: "İyul ayında elektrik enerjisi istehsalında tarixi ikiqat rekorda imza atdıq. Yerli mənbələrdən istehsalımızı 24,75 milyard kilovatt-saata, günəş enerjisinə əsaslanan istehsalımızı isə 5,37 milyard kilovatt-saata çatdırdıq" deyib.

Türkiyənin günəş enerjisi istehsalı iyul ayında 5,37 milyard kilovatt-saatla bütün zamanların ən yüksək həddinə çatıb.

Enerji və Təbii Sərvətlər Nazirliyinin açıqlamasına görə, Türkiyənin iyul ayında ümumi elektrik enerjisi istehsalı 34,6 milyard kilovatt-saat olub.

Ötən ay elektrik enerjisi istehsalında ən böyük payı 26,2 faizlə su elektrik stansiyaları (SES) təşkil edib. SES-lər bu dövrdə 9,07 milyard kilovatt-saat elektrik enerjisi istehsal edib.

İyun ayında 4,99 milyard kilovatt-saatla bütün zamanların ən yüksək həddinə çatan günəş enerjisi istehsalı iyulda yeni rekord vurub. Günəş enerjisindən elektrik enerjisi istehsalı iyul ayında 5,37 milyard kilovatt-saata çatıb ki, bu da ümumi elektrik enerjisi istehsalının 15,5 faizini təşkil edir.

Bu dövrdə bərpaolunan mənbələrdən 20,14 milyard kilovatt-saat elektrik enerjisi istehsal edilib ki, bu da ümumi istehsalın 58,2 faizinə bərabərdir.

Yerli mənbələrdən elektrik enerjisi istehsalı da iyul ayında 24,75 milyard kilovatt-saat olmaqla bütün dövrlərin ən yüksək aylıq göstəricisinə çatıb. Ümumi elektrik enerjisi istehsalında yerli mənbələrin payı 71,5 faiz olaraq hesablanıb.