Türkiyə Futbol Federasiyası (TFF) A Milli Futbol Komandasının baş məşqçiliyinə Sergen Yalçının gətirildiyini açıqladı.
Bundan əlavə, Mərkəzi Hakim Komitəsinin (MHK) sədrliyinə isə İngiltərə Premyer Liqasının keçmiş hakimi Entoni Teylorun təyin edildiyi bildirilib.
TFF tərəfindən oktyabrın 20-də verilən bəyanatda İdarə Heyətinin hər iki təyinatı da təsdiqlədiyi qeyd olunub.
53 yaşlı S.Yalçının məşqçilər korpusu ilə birlikdə dörd illik müqavilə imzalayacağı bildirilir. Entoni Teylor isə Mərkəzi Hakim Komitəsinin sədri olan ilk əcnəbi mütəxəssis kimi tarixə düşüb.
Sergen Yalçın yenidən səhnədədir
Peşəkar futbolçu karyerasına İstanbul nəhəngi "Beşiktaş"da başlayan Sergen Yalçın bir dövr milli komandanın da şərəfini qoruyub. O, "Qaziantepspor", "Sivasspor", "Kayserispor", "Konyaspor", "Alanyaspor", "Yeni Malatyaspor" və "Antalyaspor" kimi bir çox Türkiyə klubunda baş məşqçi kimi çalışıb.
S.Yalçın məşqçilik karyerasındakı ən böyük uğurunu 2020-2021-ci illər mövsümündə əldə edib. O, "Beşiktaş"la həm Süper Liqa çempionluğu, həm də Türkiyə Kubokunu qazanıb.
S.Yalçın bu uğurla "Beşiktaş" tarixində həm futbolçu, həm də baş məşqçi kimi liqa çempionluğu yaşayan ilk şəxs olub.
Futbolçuluq karyerası ilə də diqqət çəkən S.Yalçın Türkiyənin dörd böyük klubu olan "Beşiktaş", "Fenerbaxça", "Qalatasaray" və "Trabzonspor"un hər birində çıxış edən ilk futbolçu tituluna sahibdir.
Milli komanda səviyyəsində 37 dəfə ay-ulduzlu formanı geyinən və 5 qola imza atan S.Yalçın 1996 və 2000-ci illər Avropa Futbol Çempionatlarında da mübarizə aparıb.
Qeyd edək ki, bu təyinat Sergen Yalçının A Milli Komandadakı ilk baş məşqçilik dövrü olacaq.
Entoni Teylor hakimlik vəzifəsinə gətirildi
47 yaşlı Entoni Teylor Türkiyə Futbol Federasiyası İdarə Heyətinin qurumdakı vakant yerlərlə bağlı apardığı qiymətləndirmədən sonra MHK-nin yeni sədri oldu. E.Teylor yeni təyin olunan üzvlər Alan Snoddi, İqor Radoyçiç və Barış Şimşək ilə birlikdə fəaliyyət göstərəcək.
Xatırladaq ki, ingiltərəli mütəxəssis peşəkar hakimlik karyerasını yekunlaşdırdıqdan sonra, avqust ayında federasiyaya elit hakimlər üzrə direktor kimi qoşulmuşdu.
