Türkiyə Energetika və Təbii Sərvətlər Nazirliyi Türk Dövlətləri Təşkilatına (TDT) üzv ölkələrin enerji nazirlərinin beşinci görüşünə ev sahibliyi edəcək.

Nazirliyin açıqlamasına görə, enerji və təbii sərvətlər naziri Alparslan Bayraktar 9-10 dekabr tarixlərində İstanbulda keçiriləcək görüşdə mövcud və potensial əməkdaşlığı müzakirə etmək üçün həmkarları ilə ikitərəfli görüşlər keçirəcək.

Türkiyənin təşkilatçılığı ilə keçiriləcək görüşdə TDT Katibliyi, TDT üzvləri Azərbaycan, Qazaxıstan, Qırğızıstan və Özbəkistan, eləcə də TDT müşahidəçi üzvləri Macarıstan, Türkmənistan və Şimali Kipr Türk Respublikası iştirak edəcək.

9 dekabrda Texniki Enerji İşçi Qrupunun Görüşü, 10 dekabrda isə nazir Alparslan Bayraktarın ev sahibliyi ilə nazirlər səviyyəsində görüş keçiriləcək.

Görüş zamanı bərpa olunan enerji mənbələri, neft və təbii qaz, nüvə enerjisinin dinc məqsədlərlə istifadəsi, ağıllı şəbəkələr, enerji saxlama, hidrogen və karbon tutma texnologiyaları, eləcə də vacib minerallar və nadir torpaq elementləri daxil olmaqla, enerjinin bütün sahələri müzakirə olunacaq və qiymətləndiriləcək.

Görüşdə həmçinin Türkdilli dövlətlər arasında enerji əməkdaşlığının inkişaf etdirilməsi üçün konkret addımlar müzakirə olunacaq.