Ukrayna Prezidenti Volodimir Zelenski Rusiya ordusunun paytaxt Kiyevə təşkil etdiyi hava hücumlarında uşaq bağçalarını, məktəbləri və digər mülki infrastrukturu hədəf aldığını bildirib.

Rəsmi internet səhifəsində paylaşım edən Volodimir Zelenski Rusiyanın gün ərzində Kiyevə təşkil etdiyi hücumlara münasibət bildirib. Paytaxtın müxtəlif rayonlarının hədəf alındığını qeyd edən dövlət başçısı deyib: "Rusiyaya məxsus dronlar Kiyevdəki iki uşaq bağçasını, iki məktəbi, yaşayış binasını, yanacaqdoldurma məntəqəsini, eləcə də çoxsaylı anbarları və rabitə obyektlərini hədəf alıb’’.

Volodimir Zelenski bildirib ki, bu cür hücumlar dünyanın istənilən yerində terrorizm adlandırılır.

Hücumlar nəticəsində onlarla insanın yaralandığını və ölüm hallarının qeydə alındığını bildirən Ukrayna lideri hücumlarda ümumilikdə 277 drondan istifadə etdiyini açıqlayıb. O, həmçinin zədələnən obyektlər arasında Səudiyyə Ərəbistanı səfirinin iqamətgahının da olduğunu qeyd edib.

Volodimir Zelenski Dnepropetrovsk vilayətindəki idman məktəbinin, eləcə də Sumı vilayətində uşaqlar üçün istifadə edilən binanın zərər gördüyünü diqqətə çatdırıb.

Rusiyaya qarşı təzyiqlərin artırılmasının vacibliyini qeyd edən Ukrayna lideri ABŞ Prezidenti Donald Trampın sentyabr ayında imzaladığı qanunun tam şəkildə tətbiq olunmasını istəyib. Sözügedən sənəd Rusiya hökumətinə və dövlət şirkətlərinə qarşı sərt sanksiyaların tətbiqini, həmçinin Rusiyadan enerji idxal edən ölkələrə tariflərin qoyulmasını nəzərdə tutur. Zelenski bildirib ki, bu qanun tam şəkildə həyata keçirilərsə, bir çox şeyi müsbət istiqamətdə dəyişə bilər.