ABŞ Prezidenti Donald Tramp Nyu-Yorkda keçirilən BMT Baş Assambleyasının 81-ci sessiyasında çıxış edərək daxili siyasət və qlobal məsələlərə toxunub.

Çıxışının əvvəlində daxili iqtisadiyyatdan və qarşıdakı seçkilərindən danışan ABŞ lideri səkkiz müharibəyə son qoyduğunu irəli sürüb. İranla bağlı mesajlarını təkrarlayan Donald Tramp noyabrda keçiriləcək seçkilərindən sonra Tehranla razılığa gələcəklərinə inandığını bildirib.

"Hesab edirəm ki, seçkilərdən sonra biz saziş bağlayacağıq, çünki onların bundan imtina etməsinin mənası yoxdur", - Donald Tramp vurğulayıb.

Qəzza böhranına toxunan Donald Tramp Qəzza Sülh Şurasına üzv ölkələrin, o cümlədən Türkiyə, Səudiyyə Ərəbistanı, Qətər və digər dövlətlərin bölgənin yenidən qurulması üçün milyardlarla dollar vəsait ayırdığını vurğulayıb.

Rusiya-Ukrayna müharibəsinə son qoymaq üçün ciddi səylər göstərdiklərini bildirən Donald Tramp deyib: "Rusiya və Ukrayna liderləri ilə sıx əməkdaşlıq edirik, bu məsələnin öhdəsindən gələcəyik".

Kuba məsələsinə də toxunan Donald Tramp ölkə rejiminin uğursuzluğa düçar olduğunu vurğulayıb.

Qeyd edək ki, Donald Trampın çıxış zamanı Kuba nümayəndə heyəti etiraz olaraq zalı tərk edib.

Danimarka və Qrenlandiya ilə əldə etdikləri razılaşma çərçivəsində ABŞ-nin Qrenlandiyada iki böyük hərbi baza tikəcəyini açıqlayan Donald Tramp bunun ölkə təhlükəsizliyi üçün vacib olduğunu qeyd edib.