“Böyük yeddilər” (G7) ölkələrinin xarici işlər nazirləri İrana Yəməndəki husilərə göstərdiyi və "hərbi dəstək" kimi qiymətləndirdikləri yardımı dayandırmaqla bağlı çağırış edərək, bu dəstəyin davam etməsinin regiondakı gərginliyi artıra biləcəyi, beynəlxalq dəniz daşımalarını və qlobal sabitliyi təhlükəyə altına sala biləcəyi barədə xəbərdarlıq edib.
BMT Baş Assambleyasının iclasları çərçivəsində bir araya gələn Böyük Britaniya, Kanada, Fransa, Almaniya, İtaliya, Yaponiya və ABŞ xarici işlər nazirləri birgə bəyanatlarında husilərin Yəməndə və Səudiyyə Ərəbistanına qarşı davam edən hücumlarını da pisləyiblər.
Nazirlər bütün tərəfləri regionun sabitliyini daha da poza biləcək və ya qlobal iqtisadiyyat üçün həyati əhəmiyyət kəsb edən dəniz ticarətini əngəlləyə biləcək addımlardan çəkinməyə çağırıblar.
G7 həmçinin İran mənşəli hücumların dərhal dayandırılmasını tələb edib. Hörmüz boğazı və digər kritik su yolları da daxil olmaqla, dəniz marşrutlarının və gəmiçilik azadlığının qorunmasının vacibliyi vurğulanıb.
Nazirlər bəyanatda bildiriblər ki, İran rejiminin həyata keçirdiyi bütün hücumların dərhal və qeyd-şərtsiz dayandırılmasına çağırırıq.
Bununla yanaşı, Hörmüz boğazı və əlaqəli bütün kritik su yolları daxil olmaqla, dəniz marşrutlarının və gəmiçilik təhlükəsizliyinin qorunması, eləcə də qlobal təchizat zəncirinin təhlükəsizliyi və enerji bazarlarının sabitliyinin mühüm olduğu bir daha təsdiqlənib.
G7: İran nüvə silahına sahib olmamalıdır
G7 qrupu həmçinin İranın nüvə silahına sahib olmamasının vacibliyini bildirərək, Tehrana ballistik raket proqramını və regionda, eləcə də dünya miqyasında sabitliyi pozan fəaliyyətlərini dayandırmaqla bağlı çağırış edib.
Qrup həmçinin İran və İran yönümlü silahlı qruplaşmaların İraqda, xüsusilə də İraq Kürdüstan Regional rəhbərliyi bölgəsində diplomatik obyektlərə, enerji infrastrukturuna və ABŞ qüvvələrinə qarşı hücumlarını pisləyib.
Böyük Britaniya, Kanada, Fransa, Almaniya, İtaliya, Yaponiya və ABŞ-dən ibarət yeddi aparıcı sənaye dövlətinin qeyri-rəsmi birliyi olan G7 mühüm iqtisadi, təhlükəsizlik və beynəlxalq məsələləri müzakirə etmək üçün müntəzəm olaraq toplanır.
