İsrailin Qəzza zolağında həyata keçirdiyi hərbi əməliyyatlar bölgədə həyati əhəmiyyət kəsb edən 15 sektora ciddi maddi ziyan vurub. Məlumata görə, bu zərərin həcmi 80 milyard dollara çatıb. Qəzza Hökumətinin Media Ofisinin yaydığı bəyanatda infrastruktur, iqtisadiyyat, səhiyyə və təhsil kimi əsas sahələrə dəymiş zərərin miqyası açıqlanıb. Rəsmi məlumata görə, 1000 gün davam edən hücumlar nəticəsində ən böyük zərər mənzil sektoruna dəyib. Bu sahədəki itkilər təxminən 34 milyard dollar təşkil edir. Səhiyyə, xidmət və bələdiyyə sektorlarının hər birinə isə təxminən 6 milyard dollar həcmində ziyan dəyib.

Hesabata əsasən, ticarət və məişət sektorunda 5 milyard dollar, sənaye, kənd təsərrüfatı və təhsil sahələrində isə 4 milyard dollar itki qeydə alınıb. Sənəddə rabitə, internet, nəqliyyat və logistika kimi digər strateji sektorların hər birinə təxminən 3 milyard dollar ziyan dəydiyi qeyd olunub. Bundan başqa, elektrik, əyləncə və hotelçilik sektorlarının hər biri 2 milyard dollar, dini obyektlər və media sahəsi isə təxminən 1 milyard dollar zərərə uğrayıb.