Türkiyə İraq Nümayəndələr Palatasından etimad rəyi alan və mayın 14-də fəaliyyətə başlayan Baş nazir Əli Əz-Zaidi rəhbərliyindəki yeni hökuməti məmnuniyyətlə qarşılayıb.

Türkiyə Xarici İşlər Nazirliyi verdiyi bəyanatda "Baş nazir Zaidiyə bu mühüm vəzifəsində uğurlar arzulayırıq" ifadələrindən istifadə edib.

Nazirlik yeni hökumətin regiondakı həssas bir dövrdə İraqın sabitliyi, rifahı və bölgə ilə inteqrasiyası istiqamətində müsbət gündəmlə güclü addımlar atacağına dair ümidini dilə gətirib.

Nazirlik həmçinin "Türkiyə olaraq bu istiqamətdə İraqın səylərinə lazımi dəstəyi verməyə davam edəcəyik", -deyə bildirib.

Nazirlik iki ölkə arasındakı köklü bağları vurğulayaraq, İraq ilə hər bir sahədə əməkdaşlığı inkişaf etdirmək qətiyyətini də bir daha təsdiqləyib.

Etimad rəyi alan Əz-Zaidi və nazirlər mayın 14-də konstitusiya andı içərək vəzifələrinin icrasına rəsmən başlayıblar.

40 yaşlı Əz-Zaidi İraqın ən gənc baş naziri olaraq, aprelin 27-də yeni hökuməti qurmaqla vəzifələndirilib.

Onun namizədliyinin irəli sürülməsi İraq siyasətində mühüm bir aktor olan Amerika Birləşmiş Ştatlarının əvvəlki görkəmli namizəd, keçmiş Baş nazir Nuri əl-Malikiyə veto qoymasından sonra aylarla davam edən çıxılmaz vəziyyətin ardınca baş verib.

İraqın yeni kabinetindən ABŞ-nin terror təşkilatı kimi xarakterizə etdiyi silahlı qruplaşmaların Bağdad tərəfindən tərksilah edilməsi ilə bağlı Vaşinqtonun uzun müddətdir davam edən tələbini yerinə yetirməsi gözlənilir.

ABŞ rəsmisinin sözlərinə görə, fevralın 28-də Amerika Birləşmiş Ştatları və İsrailin İranı vurmasından sonra, atəşkəs elan edilənə qədər sözügedən qruplaşmalar İraqdakı ABŞ obyektlərinə 600-dən çox hücum təşkil edib.

Vaşinqton da bu qruplaşmaların mövqelərini və bazalarını hədəf alaraq, onlarla üzvünü öldürüb.