Ermənistan Mərkəzi Seçki Komissiyasının açıqladığı ilkin nəticələrə görə, seçki qutularının 48,22 faizi açılarkən, iqtidardakı "Vətəndaş Müqaviləsi" Partiyası 50,89 səs faizinə çatıb. Milyarder Samvel Karapetyanın liderliyindəki Güclü Ermənistan Alyansı isə 23,23 faiz səs toplayıb.
Əvvəlki Prezident Robert Koçaryanın liderliyindəki Ermənistan Alyansı isə səslərin 9,59 faizini alaraq üçüncü yerdə qərarlaşıb.
Mərkəzi Seçki Komissiyası seçkilərdə iştirak faizini 58,97 olaraq müəyyən edib. Buna əsasən, seçkilərdə 1 milyon 476 min 597 nəfər səs verib.
Nəticələrin ardından mətbuat konfransı keçirən Paşinyan "Vətəndaş Müqaviləsi” Partiyası seçkidə qələbə qazandı və hökuməti quracaq" deyib.
Paşinyan, həmçinin partiyasının əldə etdiyi nəticəni "Ermənistanın varlığını və inkişafını təmin edəcək tarixi qələbə" kimi qiymətləndirib.
Seçki Nikol Paşinyanın 2018-ci ildə hakimiyyətə gəlməsindən bəri keçən təlatümlü dövrün ardından reallaşdırılıb.
ABŞ Prezidenti Donald Tramp seçki öncəsində, "yaxın dostu və lider" kimi xarakterizə etdiyi Paşinyanın yenidən seçilməsi üçün "Tam dəstəyini" açıqlamışdı.
Müxalifətin iddiaları
Müxalifət partiyaları isə seçki prosesində müxtəlif qanunsuzluqların baş verdiyini irəli sürərək, rəsmiləri xüsusilə seçki kampaniyalarında çalışan işçilərə təzyiq göstərməkdə ittiham edib.
Ermənistan İstintaq Komitəsi təkrar səsvermə də daxil olmaqla, seçki pozuntusu iddiaları ilə bağlı 59 təhqiqat başladıldığını və doqquz nəfərin saxlanıldığını bəyan edib.
Seçkilərdə Paşinyanın demokratiya göstəricisi də mühüm müzakirə mövzularından biri olub. Hakimiyyətə gəlişindən səkkiz il keçən Paşinyan son dövrlərdə demokratik standartlarda geriləməyə səbəb olduğu istiqamətindəki tənqidlərlə qarşı-qarşıya qalıb.
Buna baxmayaraq, bir çox erməni seçici üçün müxalifət partiyaları hələ də Rusiyanın təsiri və oliqarxlarla olan əlaqələri səbəbindən tənqid olunur.
Türkiyə Xarici İşlər Nazirliyi Ermənistandakı parlament seçkiləri ilə bağlı bəyanat yayıb
Türkiyə Respublikası Xarici İşlər Nazirliyinin bəyanatında Ermənistanda 2026-cı il iyunun 7-də keçirilən parlament seçkilərinin sülh və əmin-amanlıq şəraitində uğurla başa çatması məmnunluqla qarşılanıb.
Nazirlikdən verilən açıqlamada seçki nəticələrinin Ermənistan xalqı üçün xeyirli olmasının arzu edildiyi bildirib. Seçkilərdən sonrakı dövrdə Ermənistanın bölgədə sülh və normallaşma istiqamətində daha cəsarətli addımlar atacağına ümid dilə gətirilib.
Bəyanatda deyilir: “Bu məqsədlə Türkiyə dövləti indiyə qədər olduğu kimi, bundan sonra da region ölkələrinin ortaq mənafeləri əsasında regional sabitliyə və rifaha töhfə verməyə davam edəcəkdir.”
