Sürətlə yayılan “Ebola” virusu epidemiyası səbəbindən Demokratik Konqo Respublikasında təxminən 131 nəfərin həyatını itirdiyi bildirilir. Həkimlər hazırda 500-dən çox yoluxmuş şəxsi nəzarətdə saxlayırlar.
Ümumdünya Səhiyyə Təşkilatı (ÜST) ölümcül epidemiyanı müzakirə etmək məqsədilə mayın 19-da fövqəladə komitənin iclasını keçirəcək. Bu barədə BMT-nin səhiyyə agentliyi rəhbərinin epidemiyanı beynəlxalq səviyyəli ictimai səhiyyə vəziyyəti elan etməsindən iki gün sonra ÜST sözçüsü AFP-yə açıqlama verərək bildirib.
Nadir rast gəlinən "Bundibugyo" (Ebola variantı) ÜST-nin beynəlxalq əhəmiyyətli ictimai səhiyyə fövqəladə vəziyyəti elan etməsinə yol açıb.
Yoluxma hallarının böyük qismi Konqo Demokratik Respublikasında qeydə alınıb. Epidemiya həmçinin virusun 2007–2008-ci illərdə ilk dəfə müəyyən edilən ştamının tapıldığı Uqandaya da sıçrayıb.
2024-cü ildə dərc olunan qlobal araşdırmaya görə, "Bundibugyo" variantı virusa yoluxanların 30–40 faizinin ölümünə səbəb olur. Bu ştam "Zair" variantı ilə müqayisədə daha az ölümcüldür. "Zair" variantında isə yoluxma hallarının 90 faizə qədəri ölümlə nəticələnə bilir.
"Bundibugyo" insanlarda həyat üçün təhlükə yaradan xəstəliklərə yol açan “Ebolavirus” cinsinin dörd növündən biridir. Bütün “Ebola” virusları yoluxmuş heyvanların və ya insanların bədən mayeləri ilə birbaşa təmas, yaxud bu mayelərin bulaşdığı əşyalar vasitəsilə ötürülür.
Bədən mayeləri ilə yoluxma riski xəstəxana əməkdaşları üçün xüsusi təhlükə yaradır. Konqo Demokratik Respublikasında fəaliyyət göstərən amerikalı bir həkim də mövcud epidemiya zamanı virusa yoluxub.
Qeyd edək ki, hazırda "Bundibugyo" virusuna qarşı təsdiqlənmiş hər hansı peyvənd və ya dərman vasitəsi yoxdur. Sınaq mərhələsində olan müalicələrin və ya digər variantlara qarşı təsirli olduğu bilinən mövcud üsulların tətbiqi üçün təcili istifadə icazəsi tələb oluna bilər.
Primatlar üzərində aparılan sınaqlarda "Bundibugyo" variantını nəzarət altına almağa kömək etdiyi müəyyən olunan potensial namizədlər arasında "Merck" şirkətinin "Ervebo", "Mapp Biopharmaceutical"ın "MBP 134" və "Auro Vaccines" firmasının "VesiculoVax" preparatları yer alır.
