Suriyanın SANA xəbər agentliyinin məlumatına görə, paytaxt Dəməşqdə Müdafiə Nazirliyi binasının yaxınlığında baş verən partlayış nəticəsində bir suriyalı əsgər həlak olub, bir neçə nəfər isə yaralanıb.

Ölkənin Müdafiə Nazirliyinin media və kommunikasiya şöbəsindən verilən açıqlamada bildirilib ki, ordu Dəməşqin Bab Şərqi rayonundakı nazirlik binalarından birinin yaxınlığında əldəqayırma partlayıcı qurğu aşkar edib. Təhlükəsizlik qüvvələrinin operativ müdaxiləsi sayəsində həmin qurğu zərərsizləşdirilsə də, eyni ərazidə başqa bir avtomobilin partlaması insan tələfatına səbəb olub.

Dəməşq təcili yardım xidmətinin direktoru Nəcib əl-Nəəsən "Alikhbariah" televiziyasına müsahibəsində hadisə zamanı bir nəfərin öldüyünü, 12 nəfərin isə yaralandığını təsdiqləyib. Hələlik heç bir qruplaşma törədilən terror hücumuna görə məsuliyyəti öz üzərinə götürməyib.

Qeyd edək ki, bu hadisə Bəşər Əsədin 24 illik hakimiyyəti devrildikdən sonra idarəetməni ələ alan yeni Suriya hökumətinin ölkədə sabitlik yaratmağa çalışdığı bir vaxtda baş verib. Ölkənin yeni Prezidenti Əhməd əl-Şaraa 2025-ci ilin yanvarından rəsmən vəzifəsinin icrasına başlayıb.