Türkiyənin daxili işlər naziri Mustafa Çiftçi italiyalı həmkarı Matteo Piantedosi və onu müşayiət edən nümayəndə heyəti ilə görüşüb. Görüşlə bağlı rəsmi internet səhifəsində paylaşım edən Mustafa Çiftçi qanunsuz miqrasiya, miqrant qaçaqmalçılığı, terrorla mübarizə, yeni nəsil mütəşəkkil cinayətkar qruplarla mübarizə və cinayətkarların ekstradisiya prosesini müzakirə etdiklərini bildirib.
Nazir vurğulayıb ki, sərhədyanı təhdidlərə qarşı mübarizə yalnız güclü beynəlxalq həmrəylik və effektiv əməkdaşlıq sayəsində mümkündür.
Müzakirələr zamanı Aralıq dənizi hövzəsində qanunsuz miqrasiyanın qarşısının alınması üçün birgə səylərin artırılması, terror təşkilatlarının maliyyə resurslarının və təbliğatının dondurulması, həmçinin İtaliyada sığınan mütəşəkkil cinayətkar dəstə rəhbərlərinin Türkiyəyə ekstradisiya edilməsi ilə bağlı gözləntilər italiyalı nazirin diqqətinə çatdırılıb. İtaliyanın daxili işlər naziri Matteo Piantedosi isə öz növbəsində ölkəsində mütəşəkkil cinayətkarlıqla qətiyyətli mübarizə aparacaqlarını bildirib və bu şəbəkələrə qarşı daha effektiv nəticə əldə etmək üçün birgə istintaq və araşdırma qruplarının yaradılmasını təklif edib.
