Türkiyənin xarici işlər naziri Hakan Fidan iyunun 8-də X Türkiyə-Azərbaycan-Gürcüstan xarici işlər nazirləri 10-cu görüşünə ev sahibliyi edəcək.

Diplomatik mənbələrdən əldə edilən məlumata görə, nazir Hakan Fidanın təşəbbüsü ilə keçiriləcək sammitdə Azərbaycanın xarici işlər naziri Ceyhun Bayramov və Gürcüstan Baş nazirinin müavini, xarici işlər naziri Maka Botçorişvili iştirak edəcəklər. Təxminən 14 ildir fasiləsiz fəaliyyət göstərən bu üçtərəfli mexanizm regionda sabitlik və iqtisadi inteqrasiya üçün ən konkret platforma kimi seçilir.

İstanbulda baş tutacaq sammitdə üç ölkə arasında mövcud əməkdaşlıq sahələri nəzərdən keçiriləcək və gələcək birgə addımlar planlaşdırılacaq. Görüşün əsas gündəliyinə Cənubi Qafqazdakı regional inkişaflar, xarici siyasət məsələləri və əməkdaşlıq perspektivləri daxil edilib. Bununla yanaşı, tərəflər Orta Dəhliz çərçivəsində regional tranzit şəbəkələrinin və logistika əlaqələrinin gücləndirilməsi, həmçinin enerji təhlükəsizliyi, ticarət və iqtisadi tərəfdaşlığın dərinləşdirilməsi mövzularını geniş müzakirə edəcəklər. Üç ölkə arasında siyasi dialoqun institusionallaşdırılması məqsədilə təsis edilən bu formatın ilk görüşü 8 iyun 2012-ci ildə Trabzonda, sonuncu görüşü isə 15 mart 2024-cü ildə Bakıda baş tutub. İstanbulda keçiriləcək 10-cu sammitin Asiya ilə Avropa arasında strateji körpü olan hər üç ölkənin təhlükəsizlik və iqtisadi maraqlarını daha da gücləndirəcəyi gözlənilir.