Rəsmi Tehran bəyan edib ki, ABŞ-nin ölkədəki nüvə və ya digər strateji obyektlərə edəcəyi hər hansı hücum Amerikanın və onun müttəfiqlərinin maraqlarını hədəf alan sərt cavabla qarşılanacaq.
İran Silahlı Qüvvələrinin Baş Qərargahından verilən xəbərdarlıqda bildirilib ki, ABŞ-nin ölkənin nüvə və ya həssas obyektlərinə qarşı hərbi addımı müharibənin region boyunca genişlənməsi kimi qiymətləndiriləcək. Belə bir ssenari baş verəcəyi təqdirdə, Vaşinqtonun və onun müttəfiqlərinin bölgədəki obyektlərinə Silahlı Qüvvələr tərəfindən "güclü" regional zərbələr endiriləcək.
Bu xəbərdarlıq ABŞ Prezidenti Donald Trampın İranın Natanz nüvə kompleksi yaxınlığında yerləşən Kazma dağı yeraltı obyektini vurmaqla hədələməsindən sonra verilib. Tramp ABŞ-nin bölgəyə "çox güclü" zərbələr endirə biləcəyini bəyan edib.
ABŞ prezidenti İranın həmin əraziyə nüvə sentrifuqaları köçürdüyünü düşündüyünü, lakin Vaşinqtonun hələlik bu məlumatı rəsmən təsdiqləmədiyini əlavə edib.
Küveytdəki radar sistemləri hədəfə alınıb
Digər tərəfdən, İran İslam İnqilabı Keşikçiləri Korpusu (SEPAH) "Nəsr-2" əməliyyatının 24-cü dalğası çərçivəsində Küveytdəki Əli əl-Salem hava bazası yaxınlığında yerləşən erkən xəbərdarlıq radarını, taktiki radar kompleksini və Bubiyan adasındakı daha bir radar sistemini məhv etdiyini açıqlayıb.
SEPAH radar sistemlərinin tamamilə sıradan çıxarıldığını və "təcavüzkara" (ABŞ) qarşı hərbi əməliyyatların davam etdiriləcəyini bildirib.
ABŞ keçən həftədən bəri İrana qarşı hava zərbələrini intensivləşdirib. Tehran isə cavab olaraq ABŞ ordusunun region ölkələrində istifadə etdiyi baza və obyektləri hədəf almağa davam edir.
Qeyd edək ki, ABŞ və İran arasında gərginliyin artması, fevral ayında başlayan hərbi əməliyyatları dayandırmaq və davamlı sülhə nail olmaq məqsədilə iyun ayında Pakistanın vasitəçiliyi ilə imzalanmış anlaşma memorandumuna baxmayaraq baş verir.
