Ötən həftə sonu Türkiyənin Antalya şəhərində keçirilən Antalya Diplomatiya Forumu minlərlə lideri bir araya gətirərək beynəlxalq böhranların həlli istiqamətində mühüm platformaya çevrilib. Forumun bağlanış mərasimində çıxış edən Türkiyənin xarici işlər naziri Hakan Fidan ölkəsinin diplomatiya və vasitəçilik missiyasının getdikcə gücləndiyini vurğulayıb.
Üç gün ərzində Antalyanın qlobal diplomatiyanın mərkəzi olduğunu bildirən nazir Asiya-Sakit okean regionundan Latın Amerikasına, Avropadan Orta Asiyaya qədər geniş coğrafiyanı əhatə edən böhranların 52 müxtəlif sessiyada müzakirə edildiyini diqqətə çatdırıb.
Tədbir çərçivəsində Türkiyə Prezidenti Rəcəb Tayyib Ərdoğan və digər rəsmilər həmkarları ilə çoxsaylı ikitərəfli və çoxtərəfli görüşlər keçiriblər. Bu görüşlər arasında Türkiyə, Səudiyyə Ərəbistanı, Misir və Pakistan nümayəndələrinin iştirakı ilə baş tutan dördtərəfli toplantı xüsusi əhəmiyyət kəsb edib. Regional sabitlik, iqtisadi əməkdaşlıq və münaqişələrin həllinə yönələn bu görüş barədə danışan Hakan Fidan deyib: "Məqsədimiz bu dörd ölkənin regional məsələləri real və tətbiq oluna bilən gündəmlə həll etməsidir. Əgər region xarici yardım gözləməyə davam edərsə, mövcud problemlər sonsuz bir hal alacaq’’.
Hakan Fidan sözügedən əməkdaşlığın hərbi ittifaq yaratmaq məqsədi daşıdığı barədə iddiaları qətiyyətlə rədd edib. O, Türkiyənin əsas prioritetinin münaqişələrdən uzaq durmaq, sabitliyi və iqtisadi inkişafı təmin etmək olduğunu bildirib. "Biz başqalarına qarşı ittifaq qurmuruq. Biz bölgəmizdəki münaqişələrə son qoymaq və iqtisadi tərəqqiyə nail olmaq üçün yollar axtarırıq",-deyə Hakan Fidan vurğulayıb.
Qeyd edək ki, forum çərçivəsində müsəlman ölkələrindən olan altı nümayəndə heyəti Qəzza sülh planı ilə bağlı son vəziyyəti müzakirə etmək üçün bir araya gəlib. Görüş iştirakçıları regionda davamlı sülhün bərqərar olması istiqamətində öhdəliklərini bir daha təsdiqləyiblər.
Məlumata əsasən, tədbirdə 23 dövlət və hökumət başçısı, 13 vitse-prezident və 50 nazir iştirak edib. Ümumilikdə 150 ölkə və 66 beynəlxalq təşkilatın təmsil olunduğu forumda 6400-dən çox adam iştirak edib.
