Kosovo Parlamenti konstitusiya ilə müəyyən edilmiş müddətdə yeni prezidenti seçə bilməyib və bu uğursuzluq ölkəni növbəti parlament seçkilərinin astanasına gətirib. Səsvermədə yalnız hakim "Öz müqəddəratını təyin etmə" hərəkatı və azlıqların nümayəndələri iştirak edib. Gün ərzində keçirilən dörd iclasda toplanan 64 səs dövlət başçısının seçilməsi üçün yetərli olmayıb. Ölkə qanunvericiliyinə görə, 120 yerlik parlamentdə qərarın qəbulu üçün deputatların üçdə ikisinin dəstəyi mütləqdir.
Dekabr ayında keçirilən seçkilərdə səslərin 51 faizini toplayan Baş nazir Albin Kurtinin təklif etdiyi namizədlər digər partiyaların dəstəyini qazana bilməyib. Parlamentin sədri və prezident vəzifəsini müvəqqəti icra edən Albulena Hakxiu müxalifətdəki Kosovo Demokratik Partiyası və Kosovo Demokratik Liqasını müzakirələrə dəvət etsə də, onlar iclaslarda iştirakdan imtina ediblər. Baş nazir Kurti növbədənkənar seçkilərin vəziyyəti dəyişməyəcəyini, sadəcə "institusional əzabların" davam edəcəyini vurğulayıb. Hakxiunun yaxın günlərdə 45 gün ərzində keçirilməsi nəzərdə tutulan növbədənkənar parlament seçkiləri barədə rəsmi qərar verəcəyi gözlənilir.
