Muğayyir Kənd Şurasının sədri Əmin Əbu Aliyə Fələstinin rəsmi WAFA agentliyinə verdiyi bəyanatda İsrail hərbçiləri və Fələstin torpaqlarını qəsb edən israillilərin Ramallah yaxınlığındakı Muğayyir kəndinə basqın etdiyini bildirib.

Əbu Aliyə İsrail hərbçiləri ilə birlikdə kəndin mərkəzinə doğru irəliləyən israillilərin fələstinlilərə məxsus iki evə hücum edərək qoyunlarını oğurladıqlarını deyib.

İsrail ordusunda vəzifəli snayperlərin kəndin mərkəzindəki binalarda mövqe tutduğunu bildirən Əbu Aliyə hərbçilərin qoyunları oğurlayan israillilər ilə yerli sakinlər arasında baş verən insidentə atəş açaraq müdaxilə etdiyini qeyd edib.

Açılan atəş nəticəsində 2 fələstinli gəncin ağır yaralandığını vurğulayan Əbu Aliyə bu şəxslərin xəstəxanaya çatdırılarkən müdaxilələrə baxmayaraq həyatlarını itirdikləri məlumatını verib.

Fələstın Səhiyyə Nazirliyindən verilən bəyanatda isə, "İsrail ordusunun Muğayyir kəndində atəş açması nəticəsində 19 yaşlı Ömər Məhəmməd Naci Naasan və 16 yaşlı Xəlil Rasim Xəlil Şəhadə həyatını itirib" deyilib.

İsrailin Qəzzada 8 oktyabr 2023-cü ildə başladığı hücumlarla yanaşı İordan çayının qərb sahili və Şərqi Qüdsdə İsrail ordusunun və Fələstin torpaqlarını qəsb edən israillilərin fələstinlilərə qarşı hücumları da artıb.

Bu hücumlar qətl, saxlanılma, məcburi köçürülmə, evlərin sökülməsi və yaşayış məskənlərinin genişləndirilməsi şəklində həyata keçirilir.