Türkiyənin SAHA 2026 Beynəlxalq Müdafiə və Aviasiya Sərgisi mayın 5-də İstanbul Sərgi Mərkəzində qapılarını ziyarətçilərin üzünə açıb. Sərgidə 120-dən çox ölkədən 263 beynəlxalq şirkət və 30 mindən artıq sahə mütəxəssisi ilə yanaşı, 1700 şirkət iştirak edir.
Tədbir Türkiyə və Avropanın ən böyük müdafiə, aviasiya və kosmik sənaye klasteri olan “SAHA İstanbul” tərəfindən təşkil olunur. Bildirilir ki, keçirilən sərgi mayın 9-dək İstanbul Sərgi Mərkəzində ziyarətçiləri qəbul edəcək.
Ümumilikdə 400 min kvadratmetr qapalı və açıq sahədə təşkil edilən SAHA 2026-da 20 min kvadratmetr ərazi açıq hava sərgi sahəsi kimi ayrılıb. Bu isə “SAHA” sərgisini indiyədək təşkil edilən ən böyük tədbirlərdən birinə çevirib.
Sərgidə 263 beynəlxalq şirkət də daxil olmaqla, 1700-dən çox şirkət və 120-dən artıq ölkədən 30 mindən çox sahə mütəxəssisi iştirak edir.
SAHA 2026 zamanı ümumilikdə 203 yeni məhsul təqdim ediləcək və 164 imzalama mərasimi keçiriləcək. Tədbirdə imzalanacaq ixrac müqavilələrinin ümumi dəyərinin SAHA 2024-də qeydə alınan 6,2 milyard dollardan bu il ən azı 8 milyard dollara yüksələ biləcəyi bildirilir.
Tədbirdə Avropa, ABŞ və Kanada şirkətlərinin iştirakı ön plana çıxarkən, dörd qitədən çox sayda şirkət, şirkət nümayəndəsi, rəsmi heyət, ticarət heyəti və ziyarətçi İstanbulda bir araya gəlir.
Bir çox yüksək texnologiyalı və yenilikçi məhsul SAHA 2026-da ilk dəfə qlobal ekosistemə təqdim ediləcək. Sərgi çərçivəsində Ataköy Marinasında yerli imkanlarla hazırlanmış pilotsuz dəniz vasitələri də nümayiş olunur.
Türkiyənin müdafiə şirkətləri yeni texnologiyaları təqdim edəcək
SAHA 2026 tədbirində bəzi texnologiyalar ilk dəfə geniş şəkildə nümayiş etdiriləcək.
Türkiyənin PUA istehsalçısı “Baykar” 1000 kilometrdən çox uçuş mənzili və süni intellekt dəstəkli avtonom imkanları ilə diqqət çəkən, milli və yerli imkanlarla hazırlanmış süni intellekt dəstəkli MIZRAK sursatını nümayiş etdirəcək.
“Baykar”ın K2 kamikadze PUA-sı və “Sivrisinek” adlı sursatı da SAHA 2026 sərgisində ilk dəfə sərgilənəcək.
Türkiyənin digər müdafiə sənayesi nəhəngi ASELSAN isə beş yeni məhsul və mövcud məhsullarının təkmilləşdirilmiş altı versiyasını təqdim edərək gələcəyin milli texnologiyalarını qlobal müdafiə ekosistemi ilə bir araya gətirəcək.
ROKETSAN və FNSS müdafiə sistemləri şirkəti arasında əməkdaşlıq nəticəsində hazırlanmış və geniş şəkildə “lazer silahı” kimi tanınan Xüsusi Enerji Silah Sistemi Platforması da SAHA 2026-da əlavə imkanları ilə nümayiş etdiriləcək.
Türkiyənin müdafiə sənayesi nəhəngi ROKETSAN-ın ən yeni və ən qabaqcıl texnologiya məhsulları da sərgidə təqdim olunacaq. Türkiyənin müdafiə sənayesi sahəsində fəaliyyət göstərən “Savunma Teknolojileri Mühendislik ve Ticaret A.Ş.” şirkəti (STM) isə müasir döyüş meydanının ehtiyacları üçün hazırlanmış hava və dəniz sistemlərini ilk dəfə sərgiləyəcək.
Qeyd edək ki, sərgidə 140-dan çox rəsmi heyət, 800-dən artıq rəsmi heyət üzvü və 200-dən çox kommersiya tədarük heyətinin nümayəndəsi iştirak edir.
