Türkiyə Milli Müdafiə Nazirliyi üçtərəfli müdafiə müqaviləsinin regional sabitliyi dəstəklədiyini, lakin heç bir ölkəni ortaq düşmən və ya rəqib kimi hədəfə almadığını bildirib.

Türkiyə Cümhuriyyəti Milli Müdafiə Nazirliyi Türkiyə, Pakistan və Səudiyyə Ərəbistanı arasında imzalanmış müdafiə sazişinin birgə hərbi imkanları inkişaf etdirməyi hədəflədiyini və heç bir ölkəni rəqib və ya düşmən kimi görmədiyini açıqlayıb.

Nazirliyin həftəlik mətbuat brifinqində çıxış edən Mətbuat və İctimaiyyətlə Əlaqələr üzrə sözçü, kontr-admiral Zeki Aktürk bildirib ki, ikitərəfli əməkdaşlıq, regional təşəbbüslər və çoxmillətli missiyalar çərçivəsində müxtəlif coğrafiyalarda uğurla fəaliyyət göstərən Türkiyə Silahlı Qüvvələri regional və qlobal sülhün qorunmasında aparıcı rol oynamağa davam edir.

Avqustun 7-də imzalanan Məkkə Müdafiə Sazişinə toxunan Aktürk bildirib ki, saziş üç ölkə arasında mövcud dostluq və qardaşlıq münasibətlərini müdafiə və təhlükəsizlik sahələrində daha institusional və davamlı təməl üzərində qurmağı hədəfləyir.

Aktürk qeyd edib ki, sazişin əsas məqsədləri regional təhlükəsizlik və sabitliyə töhfə vermək, hərbi əməkdaşlığı inkişaf etdirmək və potensial böhranlarda birgə əməliyyat imkanlarını gücləndirməkdir: "Bu müqavilə müdafiə xarakteri daşıyır və heç bir ölkəni ortaq düşmən kimi hədəf almır".

Yüksək səviyyəli koordinasiya və mərhələli təlimlər

Kontr-admiral Zeki Aktürk bildirib ki, saziş üç ölkə arasında ən yüksək səviyyədə koordinasiyanı təmin etmək üçün müdafiə nazirləri, xarici işlər nazirləri, baş qərargah rəisləri və qüvvələr komandanlarını əhatə edən strateji, siyasi və hərbi mexanizmlərin yaradılmasını nəzərdə tutur.

Hərbi əməkdaşlığın tədricən inkişaf etdiriləcəyini vurğulayan Aktürk deyib: "Bu çərçivədə ilk növbədə komanda məntəqəsi və sahə təlimləri keçirmək, sonrakı mərhələlərdə isə quru, dəniz, hava, hava hücumundan müdafiə və pilotsuz sistemləri əhatə edən birgə təlimlər təşkil etmək hədəflənir".

Aktürk vurğulayıb ki, təlimlər potensial böhranlardan əvvəl ehtiyacları və çatışmazlıqları müəyyənləşdirmək, əldə olunan təcrübələri doktrina, təlim və planlaşdırma proseslərinə daxil etmək və birgə əməliyyat qabiliyyətini davamlı olaraq təkmilləşdirmək məqsədi daşıyır.

Birgə texnologiya və istehsala xüsusi vurğu

Müdafiə sənayesində əməkdaşlığın sazişin əsas elementi olduğunu qeyd edən Aktürk bildirib: "Bu çərçivədə məqsəd yalnız hazır məhsul və sistemlərin tədarükü deyil, həm də birgə layihələndirmə və istehsal, texnoloji əməkdaşlıq, davamlı texniki xidmət və logistik dəstəyin təmin edilməsidir".

Xüsusilə pilotsuz və muxtar sistemlər, elektron müharibə və süni intellektlə dəstəklənən texnologiyalar əməkdaşlığın prioritet sahələri kimi müəyyən edilib.

NATO-ya alternativ deyil, tamamlayıcı elementdir

Məkkə Müdafiə Sazişinin beynəlxalq təhlükəsizlik arxitekturasındakı mövqeyinə toxunan Aktürk deyib:

"Məkkə Müdafiə Sazişi NATO-ya alternativ və ya rəqib deyil, regional təhlükəsizliyə və sabitliyə töhfə verərək beynəlxalq təhlükəsizlik sistemini tamamlayan bir mexanizmdir".

Aktürk bildirib ki, mexanizm formalaşdıqca və lazımi konsensus əldə edildikdə digər ölkələrin də iştirakı nəzərdən keçirilə bilər. Əsas məqsəd sülh dövründə effektiv fəaliyyət göstərən, potensial böhranlara hazır olan və lazımi məqamda konkret hərbi dəstək verə bilən institusional struktur yaratmaqdır.

O, bəyanatını belə yekunlaşdırıb: "İnanırıq ki, bu əməkdaşlıq təkcə ölkələrimizin təhlükəsizliyinə deyil, həm də regional sülhə, sabitliyə və çəkindiricilik potensialına əhəmiyyətli töhfə verəcək".