Türkiyə Prezidenti Rəcəb Tayyib Ərdoğan aprelin 22-də Ankarada NATO-nun baş katibi Mark Rutte ilə görüşüb. Prezident İqamətgahında baş tutan görüşdə paytaxtda keçiriləcək NATO Liderlər Zirvəsinə hazırlıq prosesi, alyansın gündəliyindəki əsas mövzular, regional və beynəlxalq proseslər ətraflı müzakirə olunub. Prezident Administrasiyasının Kommunikasiya İdarəsinin məlumatına görə, R.T.Ərdoğan bölgədə artan qeyri-sabitliyin NATO müttəfiqləri arasında qarşılıqlı yardım və həmrəyliyi zəruri etdiyini vurğulayıb. Türkiyə lideri Ankarada keçiriləcək sammitin üzv dövlətlər arasında birliyi gücləndirəcək və ittifaqın böhranlara hazırlıq səviyyəsini artıracaq qərarlarla yadda qalacağına ümidvar olduğunu bildirib.
Görüş zamanı Türkiyənin xüsusilə hava hücumundan müdafiə sistemləri sahəsində artan imkanlarına diqqət çəkən R.T.Ərdoğan rəsmi Ankaranın yerli müdafiə sənayesini genişləndirməkdə qərarlı olduğunu və bu sahədə müttəfiqlərlə əməkdaşlığı dərinləşdirməyi hədəflədiyini qeyd edib. Transatlantik əlaqələrin qorunmasının NATO-nun uzunmüddətli gücü üçün vacibliyini xatırladan Prezident Avropa müttəfiqlərinin ittifaq daxilində daha böyük məsuliyyət daşımalı olduğunu deyib. O, həmçinin bildirib ki, Avropa İttifaqına üzv olmayan NATO ölkələrinin Aİ-nin müdafiə təşəbbüslərindən kənarlaşdırılması alyansın ümumi strateji məqsədlərinə xidmət etmir.
R.T. Ərdoğan regional gərginliklərə toxunaraq bildirib ki, İranla bağlı son hadisələrdən sonra Türkiyə sülh və diplomatiyaya üstünlük verir. Türkiyə lideri Rusiya–Ukrayna müharibəsini diplomatik yolla bitirmək səylərini xatırladaraq bildirib ki, Ankara danışıqlar prosesini canlandırmaq və liderlər səviyyəsində birbaşa təmasların başlanmasına töhfə verməyə hazırdır. Görüşün sonunda Ərdoğan və Rutte NATO-nun Ankarada keçiriləcək sammitinə hazırlıq məsələlərini bir daha nəzərdən keçiriblər.
